Рускиот опозициски политичар Алексеј Навални е приведен на московскиот аеродром „Шереметјево“, непосредно по враќањето од лекување во странство по обидот за труење од страна на руската шпионска агенција ФСБ. Навални, чии истраги за корупција во потесниот круг на Владимир Путин предизвикаа протести и ги налутија најмоќните луѓе во земјата, вети дека ќе се врати дома и покрај најавите на Кремљ дека се подготвува да го уапси.
Полицијата го приведе Навални кратко време откако неговиот авион од Берлин слета во неделата вечерта. Требаше да слета на аеродромот „Внуково“ во Москва, каде што беа собрани стотици приврзаници. Властите го затворија аеродромот во последен момент, па авионот на Навални беше пренасочен кон „Шереметјево“ и далеку од медиумите што чекаа.
Портпаролот на Навални, Кира Јармиш, рече дека Кремљ е преплашен од Навални и од сликите на кои ќе се гледа како голем број луѓе сакаат да го поздрават. „До неодамна беше невозможно да се поверува дека тие [властите] биле толку исплашени. Но, еве ја потврдата“, твитна таа.
Откако слетаа во Русија, Навални и неговата сопруга го напуштиле авионот пред да се качат во аеродромскиот автобус со другите патници кон зградата на терминалот. Тој рече дека е „многу среќен што се врати“, додавајќи: „Ова е најдобриот ден во последните пет месеци“. Кривичните случаи против него беа измислени, рече тој, додавајќи дека правдата е на негова страна. Полициските службеници го сретнале Навални на пасошка контрола и го привеле. Навални се збогуваше со својата сопруга и исчезна со полицајците. Официјалната причина за апсењето на Навални беше непојавување на сослушување за условен отпуст.
Навални има две условни казни по пет години за случаите „Кировлеса“ и за „Ив Роше“. Во првиот случај е обвинет за проневера од над 16 милиони рубљи, а за вториот за проневерени повеќе од 30 милиони рубљи.