Катастрофата која се случи во Музејот на Македонија каде полицијата сеуште не може да утврди колкав број на артефакти недостасуваат, ја делат повеќе музеи во земјава.
„Истрагата дојде до записници за извршен инспекциски надзор од страна на комисии во кои учествувале и вработени во Музејот на Македонија во кои наместо отворање на истрага за кражба се сугерирало бришење на исчезнатите предмети од повеќе музеи во земјава од секаква евиденција“, вели за Пресс24 портпаролот во МВР Иво Котевски.
>>Од Музејот украдени и обетките кои ги красат македонските банкноти
Со години наназад не било евидентирано ниту пријавено исчезнувањето на предмети од повеќе музеи а инспекциските комисии во кои членувале и вработени од Музејот на Макеоднија едноставно препорачувале бришење на исчезнатите предмети од евиденцијата, наместо отворање на истрага.
„Поднесен е посебен извештај до Обвинителството, кој претставува пресек на се што е направено и до кои сознанија е дојдено во досегашната истрага“, објавува денеска весникот „Вест“ од полициски извори.
Информации до кои дошла полицијата се базираат на оперативните мерки и активности на МВР, како и на сознанија добиена од дел од вработените во Музејот.
„Во која насока ќе се движиме, ќе покаже понатамошната истрага. Утврдено дека имало незаконско работење кај дел од вработените, злоупотреба на службена положба и ред други пропусти. Треба да се индивидуализира и конкретизира одговорноста, но најважно од се е да се најдат и предметите кои недостигаат, доколку се уште се тука“, велат од полицијата за „Вест“.
Во канцелариите на кустосите во Музејот на Македонија било утврдено дека има 2-3000 предмети кои никаде не се евидентирани.
Вчера НОВА објави дека од најмалку 160 предмети за кои постои документација дека се исчезнати од Музејот, истражните органи утврдиле дека недостигаат 4 исклучително важни артефакти. Станува збор за златна обетка со приказ на Ерос и Амор, златна обетка со приказ на гулабица (прикажана на аверсот и на реверсот на банкнотата од 1.000 денари), златна обетка со приказ на лавовска глава и нецелосна златна обетка со чунеста форма, украсена со гранулации и палмети на која од горната страна има сфинга која седи (прикажана на аверсот и на реверсот на банкнотата од 500 денари). Последниот предмет потекнува од ископување од 1964 година од локалитетот познат како Црквиште во битолското село Беранци