Управата за финансиско разузнавање е недостапна за било каков коментар во врска со аферата Актор која ја отвори опозициската СДСМ, а која обвини дека грчката фирма која го доби проектот од Владата за изградба на автопатот Демир Капија – Смоквица извлекла повеќе од три милиони евра преку сомнителни исплати на грчки државјани, пари кои потоа и биле предавани на сметководителката на компанијата и пари за кои не се знае во чии раце завршиле.
На денешната прес конференција портпаролот на СДСМ Петре Шилегов изјави дека Управата за финансиско разузнавање минатата година отворила случај откако АД Стопанска банка пријавила дека се вршат големи исплати во кеш на грчки државјани од сметката на фирмата која го гради автопатот преку нивната филијала во Неготино. Шилегов додаде дека како што бил отворен, така потоа случајот бил мистериозно затворен.
НОВА се обиде да стапи во контакт со директорот на Управата за финансиско разузнавање, но тој денеска, според одговорите на службениците, „бил на состаноци надвор од кабинетот“.
Службеникот кој разговараше со НОВА рече дека тие не знаеле што се пишува за оваа афера бидејќи „немале интернет“, па не ги прочитале вестите. Не посочија дека „ би било залудно да им праќаме емаил пораки со прашања бидејќи секако немале интернет“.
Исто така, ни потврдија дека десетина новинари од утрово се обидуваат да добијат одговори на овие прашања, но, за жал, освен што немале интернет „поради технички дефект“ и директорот не им бил тука, а само тој можел да одговори, бидејќи, како што велат, „управата имала малку вработени и немале можности да назначат лице за односи со јавноста“.
На денешната прес конференција Шилегов откри дека мајката на директорот на Управата имала стан во истата зграда каде што станови купиле синовите на пратеничката Силвана Бонева, мајката на генералниот секретар на владата Кирил Божиновски, синот на заменик министерот за екологија Соња Лепиткова и министерката за внатрешни работи работи Гордана Јанкуловска.
СДСМ оваа афера ја отвори вчера обвинувајќи дека повеќе од три милиони евра во кеш се извлечени од парите за автопатот во незаконска шема.
-Трансакциите на извлекување на парите во кеш, преку Актор, досега одат по стандардно утврдена шема. Се реализираат преку Стопанска банка А.Д. Скопје, филијала Неготино. Ги подигнуваат физички лица, државјани на Република Грција кои помеѓу 1-ви и 10-ти секој месец наменски влегуваат во земјава, а кои воопшто не се ангажирани на изградба на овој автопат.
Доаѓаат со автобус, во банката во Неготино ги подигнуваат парите, во евра, ги предаваат парите во просториите на банката на едно лице, а потоа со автобусот заминуваат за Грција, изјави вчера Петре Шилегов.