Студентка на Медицински факултет без лиценца и положен државен испит пет месеци работела како лекарка во Итната медицинска помош, тврдат извори за НОВА од Здравствениот дом. Од податоците и документите од книгите каде што се евидентира секој повик, до кои дојде НОВА може да се види дека незавршената докторка се уште обавува самостојно докторска дејност, оди на повици и дава терапија на пациенти. Според вработените во Итната медицинска помош таа води смена, дежура и е “докторот” во амбулантните возила на повик придржувана од медицинска сестра и возач.
Од документите до кои дојде НОВА, може да се види дека 24. годишната студентка поседува и печат без број, кој е стекнат незаконски бидејќи на него има право дури по добивањето на лиценца за работа.
Вработени од Итната медицинска помош велат дека забележуваат дека печатот го крие од нив. Во времето на нејзиното вработување таа била се уште студентка, а нејзиното Уверение за завршен медицински факултет е во фаза на изработка, иако како докторка работи уште од февруари. Од деканатот на Медицински факултет во одделот за студентски прашања рекоа дека треба само уште деканот да го потпише Уверението за завршен медицински факултет. Но и со ова Уверение таа несмее да извршува докторска дејност бидејќи нема положено државен испит и нема лиценца за работа.
Но, не само што немала завршено медицински факултет кога почнала да работи, немала диплома , таа се уште нема право да полага државен испит после кој треба да се стекне со лиценца за работа. Најбрз рок за полагање на државен испит е во ноември годинава, велат лекари за НОВА.
Според нашите извори таа работи по договор на дело со месечни примања од 25 000 денари, а според нашите извори, наводно е примена по предлог од владеачката партија. Тоа се случило во февруари кога годинава кога во Здравствен дом биле примени 70 лица по договор на дело, етапно, велат нашите извори. НОВА праша во Лекарската комора на РМ дали во регистарот на лекари постои името на лекарката која врши докторска дејност во Итната медицинска помош. Од таму ни одговорија дека такво лице воопшто не постои, не е евидентирано.
„Во регистарот на лекари во Лекарската комора не постои такво лице, со тоа име и презиме, ниту некогаш постоело па да се пензионирало, починало и слично, изјави за НОВА Кочо Чакаларовски претседател на Лекарската комора на РМ.
НОВА побара објаснување и во Здравствениот дом за против законското работење на судентката по медицина, која извршува докторска дејност. Но директорката Татијана Баевска Вучковиќ не одговори на телефонскиот повик.
Еве како реагираше и што одговори во моментот на нашето јавување, посочената студентка кога и призна дека работи во Итната медицинска помош без лиценца за работа и без положен државен испит.
Надлежните денеска не одговорија кој го дозволил ова. Дали треба да се случи трагедија за да се откријат ваквите случаи? Дали ова е изолиран случај кој работи противзаконски или има уште такви “ доктори“ на кого граѓаните го доверуваат своето здравје, особено во ургентни случаи кога некогаш и секундите се значајни.