Здружението на бубрежно болни, Нефрон, смета дека Јавниот повик со кој центрите за дијализа се даваат под концесија е нетранспарентен и отвара основа за разни сомневања.
Во своите забелешки кои им ги испратиле на Министерството за здравство потенцираат дека е индикативен фактот што повикот не е објавен ниту во еден дневен весник или портал, а рокот од 30 дена и одредени одредби се многу чудни и отвараат простор за сомнеж.
Здружението воопшто не било вклучено ниту консултирано во подготовката на Јавниот повик со кој центрите за дијализа се даваат под концесија на 20 години, а со тоа се дефинира нова стратегија во нивното лекување.
НОВА дојде до забелешките кои во Министертсвото биле испратени пред две недели, но на нив до денес не им е одговорено. Здружението смета дека со овој повик се фаворизираат правни и физички лица, а меѓународните компании со големо искуство кои се производители на опрема за дијализа се ставаат во подредена положба.
Тие предупредуваат дека вака како што се поставени работите со дефинирање на разни специфичности, површини на филтри, раствори и друг потрошен материјал се фаворизираат одредени производители, а целиот проект отвара можност за сомнежи.
Особено според нив е индикативна одредбата со која компанијата која ќе добие на повикот е обврзана да склучи договор со два производители, од кои едниот ќе набавува апарати, друг раствори и слично.
-Нефрон неможе да прифати ниту дел од одговорноста од евентуалните последици поради непружената можност од страна на Министерството конструктивно да учествуваме во изготвувањето на проектот и да го го дадеме својот придонес се вели во писмото со забелешки кои беше испратено до надлежните во здравството.
Иако побараа пролонгирање на рокот за да се изнајде решение за забелешките од болните, Министерството по брза постапка го заврши Јавниот повик на кој добија двете македонски фирми Орка Холдинг и Метрополитен кои понудиле највисока цена. Тие во наредните 20 години ќе стопанисуваат со дијализата во државата, а фондот ќе биде купувач на здравствени услуги.
Од Министертвото за здравство не одговорија дали одговориле на забелешките на Здружението Нефрон и доколку не одговориле зошто не се земени во обзир нивните забелешки, како и зошто не биле вклучени во изготвувањето на Јавниот повик.
На огласот на Министерството за здравство беа доставени пет понуди од гигантот Фризениус Медикал, Орка Холдинг АД Скопје, Метрополитен ДООЕЛ Скопје , АД Д-р Пановски и СИЗ Вита дијализен центар-Тетово