Централното претседателство на ДУИ денеска не донесе одлука за можноста нивните министри да поднесат оставка во владата со ВМРО-ДПМНЕ, изјави претседателот на ДУИ, Али Ахмети по завршувањето на состанокот во Мала Речица.
Тој рече дека во ДУИ разговарале за деблокирање на статус кво ситуацијата со евентуално поднесување на оставки од страна на министрите на ДУИ во техничката влада со ВМРО-ДПМНЕ. Според Ахмети, новите избори како излез од кризата не се опција за ДУИ.
„Можат да дадат оставки, но нема каде да ги поднесат. Но и да дадат оставки ќе мора да ги извршуваат функциите до избор на нова влада“, изјави Ахмети и додаде дека за оваа опција постоеле различни аргументи.
Тој најави и консултација со правни експерти за разрешување на институционалната и политичка криза, а не исклучи ниту нови лидерски средби со лидерите на останатите политички партии.
Претходно портпаролот на ДУИ, Бујар Османи изјави дека на седницата на централното претседателство, на дневен ред има две точки, меѓу кои и разгледувањето на можноста за напуштање на техничката Влада од страна на функционерите на ДУИ.
„Втората точка се локалните избори. Според Уставот, мандатот на градоначалниците е четири години, веќе следната недела тие поминуваат и настапува еден правен вакум со функционирање на општините. ДУИ ќе разговара и за овој вакум како и за можните кандидати за градоначалници на локалните избори и самиот процес на закажување на локалните избори“, изјави Османи.