Фото: Независен Весник
Засега нема олабавување на мерките. На Комисијата за заразни болести денеска не разговарале за ова на редовниот состанок, но велат дека ја следат состојбата и бројките сами ќе го кажат моментот кога ќе дојде до попуштање на сегашните мерки. Новите податоци, пак покажуваат 22 новозаболени со КОВОД-19 на направени направени 145 тестирања.
Според ова и како и според бројот на нови дијагностицирани случаи во последните неколку денови, бројот на нови случаи со КОВИД-19 не се намалува, напротив се зголемува или останува приближно ист ако се анализира бројот на направени тестови. А бројот на направени тестови во последните 24 часа е преполовен, во однос на претходните денови. Во изминатите неколку денови бројот на заболени го држи тој тренд или се зголемува: Вчера 20 нови случаи, на 275 направени тестови, пред два дена 36 нови заболени на 411 тестирања, претходно 33 нови случаи на 332 тестирања. Но, во последните два дена нема смртни случаи.
Министерството за здравство пред три дена излезе со информација дека епидемиолошката крива бележи пад, според исходот на оздравени случаи. По ова, следуваше најава дека ќе има олеснување на мерките за заштита, за веднаш утредента да информираат дека врз основа на препораките на Комисијата за заразни болести, Владата одлучила мерките да останат на сила.
Иако министерот за здравство Венко Филипче најави дека трендот на случаите од последните два дена ќе биде разгледуван денеска, по што ќе бидат дадени нови препораки до Владата во однос на понатамашно постапување со мерките, тоа не се случи. На Комисијата за заразни болести денеска не се разговарало за олеснување на мерките.
Зошто тогаш вакви најави, се брза ли со олеснување на мерките кога претходно и министерот Филипче најавуваше дека врвот на епидемијата ќе биде на крајот на април и почетокот на мај? Зошто ова што се сега случува не е во согласност со очекувањата и која е причината да се зголемува бројот на новозаболени со КОВИД-19?
Епидемиологот и професор, Драган Даниловски вели дека точно е дека бројот на излекувани пациенти се зголемува, но бројот на нови дијагностицирани зависи од бројот на земените тестови.
„Вкупниот број позитивни на вирусот зависи од бројот на земени тестови. Затоа не е најверодостоен показател на состојбата со епидемијата. Секогаш постои ризик болеста пак да избувне, ако мерките се релаксираат премногу и прерано“, вели за НОВА Даниловски.
Жарко Караџовски, епидемиологот и претседател на Комисијата за заразни болести викендов за Телма изјави дека новите болни се од Велигден и од Први мај.
„Будно ќе ја следиме состојбата во наредните неколку дена и никаква одлука за олабавување на мерките нема да биде донесена додека не се добие информација за трендот на движење на заразното заболување Ковид -19. Денеска констатиравме дека 20 лица од овие 36 биле во контакт со заразено лице. Тоа значи дека најверојатно се работи за непочитување на мерките кои се донесени во изминатиот период. Согласно инкубацијата на ова заболување од 10 до 14 дена, ние ги лоцираме проблемите дека се случиле некаде околу Велигден и 1-ви Мај“, изјави Караџовски, за Телма во саботата, на 9 мај, алудирајќи пред се на полошкиот регион од каде што беа 20, од вкупно 36 заболени од КОВИД-19, тој ден.
Дали може да се очекува зголемување на новите слуачи со КОВИД -19, особено што минатата недела се одржа Литија во Струга каде излегоа стотици луѓе без да држат растојание и без заштитни маски. За каков пад на епидемијата зборуваме ако граѓаните и особено верските заедници не ги почитуваат мерките.
Јавното обвинителството работи на случајот по допорен глас, но велат дека чекаат МВР да постапи по издадените наредби. За НОВА потврдија дека досега немаат добиено повратна информација од Секторот за внатрешни работи во Струга.
Дополнително ИВЗ одлучи од утре да ги отвори џамиите за Рамазанските пости, а верниците молитвите да ги прават внатре, како што рекоа за НОВА, со дистанца и прекривки на лицето. За празникот Бајрам кој е на крајот на мај и кога празнувањето кулминира со посета на домовите на роднините и пријателите, во ИЗВ се уште не одлучиле.
„Рано е се уште за тоа, се зависи како ќе се одвива ситуацијата со пандемијата“, вели за НОВА, Кенан Исмаили, скопски Муфтија.
Сепак, очигледно е одлуката за олабавување на мерките ќе биде политичка и таа најмногу ќе зависи од соседните земји и од регионот каде што веќе почнаа со намалување на мерките, но и од барањето на политичките партии во државата во средината на јуни да се одржи изборниот процес.