Никој не дава пари за организација на 50 години од земјотресот во Скопје. Туристичката комора на Македонија веќе ја откажа програмата за одбележување на јубилејот, која дента на 26 јули беше замислена да почне со видеопрезентација на Скопје низ годините, неговата обнова по земјотресот, како и денешната состојба.
Испланирана беше и закуска на Кејот на Вардар, со цел на гостите да им се презентира македонската традиционална кујна, а за првпат требаше да им се дадат благодарници на земјите кои учествувале во изградбата на Скопје по земјотресот, објавува денешен Вест.
Организаторите се жалат дека не можат да ги спроведат активностите, оти за нив требаат пари кои тие сами не можат да ги обезбедат.
“Програмата ја доставивме до Влада, оттаму нe препратија во Министерството за култура, а тие, пак, нe пратија во Град Скопје. Таму ни рекоа дека за пари треба да се обратиме во Универзална сала, поради што решивме да се откажеме од нејзина реализација и да се вклучиме во одбележувањето на јубилејот на некој друг начин. Може само, ако најдеме пари, да направиме цедиња и да им ги делиме на гостите во Скопје на 26 јули. Штета што никој не дава пари да се направи спектакуларно одбележување, како што заслужуваат скопјани и Скопје”, вели Гордана Јанакиевска за одложувањето на проектот на Туристичката комора.
Вера Бошковска, директор на Универзална сала, вели дека идејата за учество на повеќе организации и граѓани во годинешниов јубилеј е сами да дадат придонес за 50-годишнината, а не некој да им плати за тоа.
“Уште кога го објавивме огласот во јануари годинава, истакнавме дека сите учесници ќе треба сами да си ги финансираат проектите кои ќе ги предложат. Се договоривме дека ако некој сака, може да се откаже во меѓувреме. Туристичка комора на Македонија и уште некои други учесници ги откажаа програмите, но затоа ќе бидат логистика во одбележувањето”, рече Бошковска.