Велат, ако немааш пари и поп нема молитва да ти испее. И Бог не има препуштено во рацете на банди од нелуѓе.
Бошко Нацевски
На еден наш сограѓанин, пред два дена животот му заврши под одрон од земја. Која му беше задната мисла на тој твој, мој, наш човек. Веројатно во тоа гробно бунило се простувал од најмилите, од рожбите, од пријателите, од животот.
Освен за унесреќеното семејство, за сите нас, што се уште дишиме, оваа трагична приказна може да се рече дека веќе е завршена.
Дебили, имаат оперирана мозочна маса, која не чувствува туѓа болка.
Шеесет и три млади животи изгореа, гламјосаа.
Четириесет и пет во автобус ги усмрти огнениот пекол.
Во друг автобус смрт најдоа 16 наши сограѓани.
Колкав е бројот на одземени животи на цутови на тротоари или на улични премини. Неброени се жртвите од огнено оружје во рацете на лудаци.
ќе пресмета ли некој колку се оние што заминаа од овој свет со молбена молитва на усните за уште ден живот од немоќ да си купат здравје во баснословно скапите приватни здравствени, да речам, касапници.
Пред три дена самиот се допсув што подолго не бев се јавил на помлад човек од Бродско, што случајно пред повеќе од деценија бев го запознал, а знаев дека здравјето му е нарушено.
Му заѕвонив и веќе ме громоса неговиот изнемоштен глас. Зборовите што следеа беа драма што трештува. Што прободува, убива. Млад живот во агонија. За спас, белите мантили му ја кажале цената – 25 илјади евра.
Овде зборовите и најблажените, најсрдечните, најискрените, не се лек. Животот ни станува се поскап, а смртта премногу ефтина.
Еден лекар, така читавме, за еден месец зел 12.000 евра, а друг, 700.000 за една година. Биле специјалисти, за живот, но би се рекло и за смрт во ова изопачено здравство на прескап бизнис, во кој не се добива гарантен лист за живот, освен трансакциска сметка за тоа колкава цена си платил за тоа парче надеж.
Немало доволно лекари специјалисти. Немало лекови. Немало термини. Немало пари за современи медицински апарати.
А болни, се повеќе.
Текстов не знам како да го завршам, освен да речам дека ние сме болно општество. Канцероген систем со селективна одговорност и правда. Животот, каков таков, за многумина никаков, скапо го плаќаш, а смртта ни е гратис.
Велат, ако немааш пари и поп нема молитва да ти испее.
И Бог не има препуштено во рацете на банди од нелуѓе.
Извор: Фејсбук