Никола Митревски Кољо претпладнево бил донесен од истражниот затвор „Скопје“ во Шуто во Специјалното јавно обвинителство. Oд СЈО за НОВА потврдуваат дека Митревски бил повикан во СЈО како сведок, но не откриваат за која постапка, односно дали е во врска со некоја од веќе објавените истраги или пак станува збор за нова.
Инаку, Митревски е еден од обвинетите за насилствата во Собранието од 27 април, минатата година. Тој, по неколкумесечно бегство, кон крајот на март, годинава сам се пријави во полиција, по што беше спроведен во истражниот затвор „Шутка“.
Постојат сомневања дека Митревски, заедно со Александар Василевски – Нинџа, исто така обвинет за „крвавиот четврток“, кој е се уште во бегство, им биле логистика во обидот за бегство на поранешните началници во УБК, Горан Грујевски и Никола Бошковски, обвинети во случаите Тврдина и Таргет на СЈО.
Нинџа и Кољо во октомври минатата година, требало од Бугарија да стигнат во Унгарија, преку Србија за да ги пречекаат Грујевски и Бошковски, по слетувањето во Будимпешта. Планот им пропаднал, откако српската гранична полиција им забрани влез во државата еден ден пред Грујевски и Бошковски да бидат уапсени во Грција.
ТВ 24 во октомври минатата година, објави информација дека Василевски и Митревски при обид да влезат во Србија, биле вратени од граничниот премин, а можната причина според познавачите е потегот на Србија да се дистанцира и да не се инволвира во случувањата во Македонија.
Откако ова беше објавено од ТВ24, Никола Митревски Коља испратил демант во кој се оградува од обвинувањата кон него.
– Во мое лично име, сакам да демантирам дека требало на некого да помогнеме и да пречекаме или пак логистика да бидеме за било кој. Точно е дека сме застанати на српска граница заради тоа што на трето лице му била пред истекување важноста на пасошот. Исто така сакам да демантирам дека се наоѓам во Бугарија. Моментално сум дома со семејството. Ве молам да не ги пополнувате вестите со нашите имиња и настаните од Собрание, туку да се земе во предвид вистината и доказите за случувањата – напишал Коља во демантот.