Преку договорените спогодби со посредство на ЕУ, Србија покажа дека сака да ја заштити спрската заедница во Косово и Метохија, и на сите жители на Покраината да им обезбеди нормален живот, порача српскиот претседател Томислав Николиќ на Генералното собрание на ОН. Меѓутоа тоа никако не значи дека Србија има намера да прифати прием на Косово во ОН, изјави Николиќ.
Претседателот на Србија порача дека Србија очекува најкасно до јануари 2014 година да ги започне преговорите за членство во ЕУ, и изрази надеж дека тие преговори нема да траат предолго или бесконечно.
Обраќајќи им се на учесниците на дебатата на Генералното собрание на ОН, српскиот претседател нагласи дека „Србија е со поглед кон времето кое доаѓа и членството во ЕУ“.
„Се надевам дека на следната сесија на Генералното собрание ќе ве известувам за напредокот во преговорите, за кои верувам дека нема да траат предолго или бесконечно, како и за напредокот што Србија континуирано ќе го генерира на нејзиниот пат кон полноправно членство во ЕУ“, изјави Николиќ.