„Македонија никогаш нема да има поголем и поискрен пријател од Србија“, изјави претседателот на Србија, Томислав Николиќ, по прошталната посета на македонскиот амбасадор во Србија, Љубиша Георгиевски.
Николиќ воедно му се заблагодари на Георгиевски за доприносот во односите помеѓу двете земји, за кои вели „се подигнати на повисоко ниво“.
Според него, тоа особено се гледа во фактот што споменикот на Зебрњак е обновен и дека минатата година, за прв пат откако Македонија е независна, еден српски празник официјално се одбележа на територијата на Македонија.
Амбасадорот Георгиевски пак, му се заблагодари на претседателот Николиќ за одличната соработка во развивањето на пријателството помеѓу двете држави, изразувајќи надеж дека и понатаму ќе се работи на приближување на двете земји и нивниот народ.