На денешната прес конференција, првиот вицепремиер задолжен за борба против корупцијата, Љупчо Николовски, потенцираше дека се создава Регистар на вистински сопственици кој ќе придонесе во вистинската слика, за тоа кој колку профитира и ќе се спречи евентуална злоупотреба на парите, кои, како што вели Николовски, денес имаат брз тек.
„Со овој регистар на вистински сопственици ќе се додаде уште една алка против корупцијата. Брзото движење на парите, причинува плодна почва за манипулација со истите. Недостатокот од релевантни и навремени информации, односно криењето на истите овозможува ваков криминал. Ако надлежните немаат доволно докази и постапки, остануваат прикриени ваквите ситуации, и го зголемува ваквиот криминал. И Централниот регистар со овој регистар на вистински сопственици, ќе биде вклучен во битката против криминалот. Со спречување на перењето на пари и финансирањето на тероризмот, остануваме на патот на европските вредности согласно сите регулативи“, изјави Николовски.
Тој појасни дека вистинските сопственици на правните лица подразбира идентификување на физичките лица кои директно или индиректно остваруваат управувачка или контролна улога во едно правно лице, односно на било каков начин имаат крајно и ефективно влијание во работењето и управувањето со истото.
Со воспоставувањето на Регистерот на вистински сопственици и Централниот регистер се вклучува во борбата против перењето пари и финансирањето тероризам.
„Целта на регистерот е да навлезе длабоко во сопственичката структура на правните субјекти за транспарентно да објави кој е тој што реално профитира од работата на компаниите во нашата земја, скриен зад комплексната слоевита правна структура“, рече Николовски.