Според пратеникот на СДСМ, Маријанчо Николов вчерашната најава за решавање на прашањето на стечајците е предизборен маркетинг и додворување на најзагрозената категорија население.
Тој нагласи дека заедно со пратеничката група на СДСМ пет пати во Собранието предлага Закон за решавање на проблемот со стечајците.
-Зошто сега кога треба да има избори премиерот се сети на стечајните работници? Останува нејасно зошто по пет години одлагање на решавањето на прашањето, премиерот сега се сети на стечајците, откако потроши пет години на градење на споменици, на жални врби, рече Николов.
Кумановското здружение на стечајците УНИТ смета дека ветувањето на премиерот Никола Груевски дека ќе ги обештети стечајните работници е предизборен маркетиншки трик.
Според Љиљана Георгиевска законот ќе опфати само мал дел од ова категорија граѓани.
„Во 2008 година, во некогашниот најголем индустриски град, обештетување добија 11 лица, а сега ниту два отсто од стечајците во Куманово нема да го решат статусот“, вели Георгиевска.
– Не е работата ноншалантно да се излезе пред медиумите и да се каже „ќе обештетиме“. Кого ќе обештетат? Мал, занемарлив број. Еве во Куманово нема да бидат опфатени ниту два отсто од работниците. Со Стојан Стојанов кога беше договорот, беа опфатени само 11 стечајни работници! Тоа докажува дека пак се работи за маркетиншки трик, рече Георгиевска.
До сега испративме 180 барања до владата за социјален дијалог и ете што се случува кога го нема, илјадници луѓе пак ќе бидат изманипулирани и ќе останат на улица.- велат од УНИТ. Најголем дел од овие работници или немаат доволно стаж, а имаат старост или пак фирмата во која работеле станала акционерско друштво.