Посредникот на ОН во разговорите за името Метју Нимиц изјави дека на преговарачите им дал нов предлог кој е всушност нова комбинација од неговите стари идеи и дека очекува тие со нивните Влади да го разгледаат.
Нимиц одби да ја коментира содржината на предлогот кој им го дал на преговарачите.
– Имам големи надежи дека овој процес се движи во позитивна насока, изјави вечерва во Њујорк Нимиц по разговорите со претставниците на двете земји Васко Наумовски и Адемантиос Василакис.
Во следнте недели Нимиц ќе ги посети Скопје и Атина за да види што луѓето мислат.
Нимиц се надева дека лидерите на опозициските партии во Грција и Македонија ќе бидат конструктивни, затоа што тие се многу важни учесници во политичкиот живот на земјите.
Додека течеше разговорот, движењето „Ние сме Македонија“ одржа мирен протест пред главниот влез на зградата на Обединетите Нации во Њујорк.
На протестот се собраа околу педесетина претставници на македонската дијаспора во САД. Тие ја интонираа химната на Република Македонија, извикуваа пароли, пееја песни и вееја македонски знамиња. Мето Колоски, претседател на Обединета Македонска Дијаспора најави помасовни и глобални протести против наводната промена на уставното име на нашата земја.