Собранието на Косово не успеа да се конституира ниту по 43. обид, откако и денеска недоволен број пратеници гласаа за предлогот за формирање на изборна комисија за избор на претседател на парламентот со тајно гласање.
За предлогот гласаа 55 од 99 пратеници кои присуствувале на седницата.
Претседавачот Авни Дехари од движењето Самоопределување и денеска ги прекина излагањата на опозициските пратеници кои побараа од него да ја почитува одлуката на Уставниот суд на Косово, со која се дава рок од 30 дена за конституирање на парламентот.
Политичките партии имаат различни толкувања на одлуката на Уставниот суд – Самоопределување смета дека одлуката дозволува промена на начинот на гласање, додека другите партии го тврдат спротивното.
Претседателката на Косово, Вјоса Османи, изјави дека за промена од јавно на тајно гласање е потребен консензус од сите политички партии, што во моментот не е можно.
Продолжението на конститутивната седница е закажано за среда, 9 јули во 11 часот.