Граѓаните коишто вчера се собраа пред Владата револтирани од содржината на снимените телефонски разговори кои вчера ги објави лидерот на СДСМ, Зоран Заев, преку социјалните мрежи за денеска најавуваат нов протест во 16 часот, исто така пред зградата на „Илинденска“ бр. 2.
Стотина граѓани вчера веднаш по прес-конференцијата на Заев излегоа и го блокираа булеварот пред Владата и на звучници ги пуштаа снимките во кои имаше телефонски разговори меѓу шефот на тајната полиција Сашо Мијалков со газдата на Канал 5, Емил Стојменов и со уредникот на Сител, Драган Павловиќ – Латас.
Покрај муабетите на Мијалков со медиумските моќници, Заев вчера пушти снимени разговори и од министерката Јанкулоска со шефот на премиерскиот кабинет Мартин Протоѓер.
Мијалков во разговорите им раскажува на Стојменов и на Латас како се случило апсењето на Љубе Бошкоски и заедно ликуваат за грубостите при спроведувањето на лидерот на Обединети за Македонија. Во разговорот меѓу Протоѓер и Јанкулоска се откриваат намерите на власта, по изборите во 2011 да се пресмета со оние коишто во кампањата им дале поддршка на Бошкоски и на СДСМ.