Приморска го совлада МЗТ Скопје Аеродром и во вториот меч од плејоф финалето во АБА 2 лигата и дојде на чекор до најквалитетното кошаркарско друштво во регионот. По вчерашните 93:71, словенечкиот состав вечерва ги порази „металците“ со 95:72 (по четвртини: 25:20, 18:13, 25:14, 27:25) за водство од 2:0 во серијата „подобар од пет“ што се сели во македонската престолнина каде во четврток (18 ч.) е планирана третата средба.
Во случај на триумф на МЗТ Скопје, во петок од 20 часот ќе следува и четвртиот судир, а евентуалната мајсторка е во понеделник во Копер. Победникот во серијата ќе осигура место во АБА лигата за сезоната 2019/20, поразениот, пак, ќе разигрува со Задар.
Маријан Чакарун со 26 коша беше најефикасен во вториот меч, Јагодиќ Куриџа постигна 17 поени, Жан Шишко 16, а Харис 13 за екипата на Приморска. Прв стрелец кај аеродромци беше Лестер Медфорд со 22 коша, по 10 додадоа Иве Иванов и Џејмс Вудард.