Освен договорот, операциите на срце кај деца ќе се прават и без лиценциран детски кардиохирург по заминувањето на Чадиковски, што се коси со законската регулатива
Не постои договор за јавно приватно партнерство меѓу Министерството за здравство и специјалната болница за кардиохирургија „Филип Втори“ иако здравствените власти проектот спектакуларно на прес-конференција го најавија во Влада во декември минатата година, дознава НОВА од добро упатени извори.
На прашање на НОВА дали постои договор за јавно приватно партнерство и барање да го добиеме на увид, од Министерството за здравство со одговор дека „ФЗОМ има склучено годишен договор за операции на деца до една година“ со што перфидно го одбегнаа одговорот и ја префрлија топката на Фондот. Но, договорот што ФЗОМ го има склучено за операции со „Филип Втори“, како и со другите здравствени установи, не е договор за јавно приватно партнерство. Токму во тој контекст е и одговорот од ФЗОМ.
„Согласно Законот за здравствена заштита и Законот за здравствено осигурување, Фондот има обврска да склучи само договор за пружање на здравствени услуги од дејноста за кардиоваскуларна хирургија со ПЗУ Клиничка болница Жан Митрев врз основа на добиена дозвола за работа во мрежата на здравствени установи, издадена од Министерството за здравство“, потврдија од ФЗОМ за НОВА.
Со ова, и со последните случувања во болницата на Жан Митрев од каде отказ си даде др. Владимир Чадиковски пропадна првиот обид на министерот за здравство Венко Филипче за јавно приватно партнерство кое го најавува во скоро сите сфери од здравството.
Нетрпеливоста меѓу Жан Митрев и Чадиковски што се наѕираше уште пред повеќе од два месеца ескалира деновиве кога Чадиковски најави заминување што ќе го аминува со отказ во четврток.
Откако букна скандалот, денеска министерот Филипче изјави дека децата и натаму ќе се оперираат кај Жан Митрев на сметка на Фондот без оглед дали заминува тимот предводен од др. Чадиковски, кој од Детска хирургија пред неколку месеци направи трансфер во таа болница.
Нејасно е како ќе се оперираат деца до една година таму, кога нема носител на дејност, односно Чадиковски е единствениот лиценциран детски кардиохирург во државата. Ваквата одлука на Филипче се коси со законската регулатива. Од Министерството за здравство со одговор дека тимот таму никогаш не оперирал самостојно.
„Докторите никогаш самостојно не изведувале операции таму. Експерти и доктори од Република Србија, во директна соработка со македонските доктори ги едуцираат за овозможување соодветен здравствен третман на сите пациенти, вклучително и на децата до една година. Сите пациенти кои имаат потреба и натаму ќе ја добиваат неопходната и квалитетна здравствена заштита во оваа Клиника“, се вели во одговорот за НОВА од Министерството за здравство.
Но, она што е несфатливо е што, Филипче за МИА изјавил дека тимот на Чадиковски си заминале на своја рака од државно во приватно здравство.
Кога го најавуваше овој проект заедно со директорот на ФЗОМ, Ден Дончев во Влада, Филипче не кажа дека Чадиковски заминува на „своја рака“ од државно во приватно туку најави дека планираат јавно приватно партнерство, а овој центар да стане регионален.
„Очекуваме овој центар да стане регионален, без конкуренција во целиот регион. Очекуваме дека овој модел ќе го преземат и околните земји, бидејќи со одлив на здравствен кадар се соочуваат и Бугарија, Србија, Албанија, Грција, Косово“, рече тогаш Филипче, на прес-конференција во Влада.
На јавноста и е познато дека идејата за ваков трансфер доаѓа од власта, а не од Чадиковски кој, како што и самиот потврди бил повикан на разговор за да му се образложи планот за преминување во приватната болница на Жан Митрев. Претходно, беше планирано изградба на државна детска кардиохирургија, но моделот на јавно приватно партнерство за Филипче и Дончев беше поисплатлив.
НОВА дознава дека веднаш откако тимот преминал кај Митрев, буџетот на болницата бил драстично зголемен, односно биле зголемени цените на услугите за операции кај деца. Од ФЗОМ не дадоа конкретни податоци дали и колку се зголемени цените на услугите, туку само колку чини една операција на срце.
„Од 01.02.2019 година, откако тимот за детска кардиохирургија се префрли од ЈЗУ Детска хирургија во ПЗУ Клиничка болница Жан Митрев, од Фондот се наменети за детска кардиоваскуларна хирургија и интервентна кардиологија кај деца до 18 години, 65.000.000 денари, но тие средства се исплаќаат по извршена и фактурирана здравствена услуга. Согласно Законот за здравствена заштита и Законот за здравствено осигурување, Фондот има обврска да обезбедува здравствени услуги од здравствената установа се додека истата има важечка дозвола за работа во мрежата на здравствени установи издадена од Министерството за здравство“, велат за НОВА од ФЗОМ.
Чадиковски за НОВА потврди дека досега направиле 8 до 10 операции од причини што многу небулози се случувале во болницата поврзани со извршувањето на операциите и работата таму. Тој вели дека проблемот е комплексен и дека неговата одлука за заминување е конечна.
„Депониран ми е отказот, во четврок кога ќе се вратам од одмор ќе го поднесам. Точно е дека направивме 8 до 10 операции кај бебиња“, рече Чадиковски за НОВА.
Од ФЗОМ пак, излегоа со бројка од 55 деца до 18 години кои биле третирани болнички од февруари до сега иако прашањето беше за патологија која ја покривал тимот на Чадиковски кај деца до една година.
Нема одговор колку државата ја чини овој трансфер и неуспешен обид за јавно приватно партнерство.
Како што е познато, од детска кардиохирургија при Клиниката за детска хирургија си замина тим од 11 вработени кој сега заедно со Чадиковски преговара за премин во друга приватна болница.
Филипче и Дончев на јавноста и должат одговори колку чини целиот проект вклучувајќи ги и платите на тимот на Чадиковски, заедно со буџетот кардиохирургија на Жан Митрев.
И секако, како планираат да го продолжат договорот без лиценциран детски кардиохирург бидејќи на ваков начин и со ваква политика (со која патем веќе не се праќаат деца во странство), граѓаните ја губат довербата и стравуваат за здравјето на своите најмили.