Родителите на Христијан Мицковски, лидерот на опозициската ВМРО ДПМНЕ се хоспитализирани во приватната болница „Аџибадем Систина“, дознава НОВА од свои извори во болницата.
Нашите извори велат дека и двајцата имаат Ковид-19, но веројатно се примени со други дијагнози како примарни, па изолирани во посебен дел, бидејќи болницата и официјално се изјасни дека нема да прима пациенти со Ковид, освен ако веќе не биле примени со друга дијагноза и се затекнале таму.
Мајка му е примена минатата недела, најверојатно на 24 јуни, а после неа и неговиот татко. Здравствената состојба на неговата мајка веќе била значително подобрена. Таа неколку дена пред приемот била позитивна на Ковид , информација која ја потврди и самиот Мицковски пред 10 дена при посетата на Струмица.
Тој тогаш рече дека не се видел со неа подолго време поради ризикот на кој е изложен од средбите и разговорите со повеќе луѓе и нагласи дека сите кои биле во контак со неа се во самоизолација.
„Веќе неколку дена, би рекол 5-6 дена е во домашни услови и посакувам добро здравје, за жал и кај нас во семејството ја почувствувавме директно оваа пандемија и се надевам дека побргу ќе помине. Ние сме тука да и ги олесниме деновите кои што доаѓаат во борбата против овој вирус. Многу сериозен е овој вирус и луѓето кој што го имаат, сериозно го преживуваат“, изјави тогаш Мицковски.
Нема официјална потврда за оваа информација од болницата Аџибадем Систина, кога НОВА праша дали неговата мајка за која Мицковски претходно потврди дека е позитивна е примена во болницата.
„ Ставот на болницата е дека го почитуваме Законот за заштита на лични податоци и никогаш не сме спомнале имиња и презимиња на пациенти, ниту во минатото, ниту сега’, велат за НОВА, од болницата Аџибадем Систина.
За да ја провериме и официјално оваа информација веќе неколку дена наидуваме на молк и од здравствените власти од каде тврдат дека немаат податок за такво нешто. Министерот Филипче рече дека нема информација за ова.
“Не знам, да прашам“, рече министерот Филипче и се заврши на тоа.
Министерот Филипче пред неколку дена на прес конференција соопшти дека се мобилизираат и јавните и приватните болници за Ковид 19. Тој рече дека од приватните болници на располагање ќе бидат ставени клиника „Жан Митрев“, болниците „Аџибадем Систина“ и „Ремедика“.
Веднаш потоа од болницата стигна соопштение во кое се вели дека не примаат пациенти со Ковид, освен тие кои за време на приемот и подготовката на интервенцијата е добиен позитивен тест за коронавирус.
„Согласно новата уредба на Владата, како и почитувајќи ги сите морално-етички и медицински принципи, ве известуваме дека Клиничката болница „Аџибадем Систина“ не овозможува третман на пациенти позитивни на Ковид-19, освен пациенти кај кои за време на приемот и подготовката за интервенција е добиен позитивен тест за коронавирус, а истите се во животно-загрозувачка состојба и е потребен итен третман.
Болницата уште од самиот почеток има протокол во кој сите хоспитализирани пациенти се тестираат за коронавирусот со PCR брз тест, и со тоа сме единствени во нашата држава.
За време на интервенцијата се почитуваат сите безбедносни протоколи за заштита на персоналот, а потоа пациентите се префрлаат во целосно изолиран и посебно опремен дел за нивен третман, кој се наоѓа во посебно издвоен дел во болницата.
Со тоа, болницата на највисоко ниво ги заштитува другите пациенти и персоналот од пренос на вирусот. Клиничката болница „Аџибадем Систина“ не прави прием на позитивни пациенти кај кои е потребен третман на болеста Ковид-19.“, се вели во соопштението до болницата.
Инаку, медиумите денеска му забележаа на Мицковски дека не дава добар пример со своето однесување во време на пандемија. Тој оди на собири со маска и ракавици, но не одржува дистанца, се поздравува со присутните и со истите ракавици крши леб што му го нудат.
Видео снимка од митинг во Јагуновце на која се гледа како се прекрстува, го крши и го јаде лебот со истите раквици, предизвика лавина од реакции на социјалните мрежи.