Се запалил апарат во Центарот за дијализа во Чаир додека еден од бубрежно болните бил приклучен на апаратот, дознава НОВА од пациенти кои се подложни на дијализа . Според неофицијалните информации, настанот се случил денеска, во претпладневните часови додека пациентите од првата смена биле на апаратите за дијализа.
Наводно, пациентот не бил повреден, а причината за инцидентот била дотраената електрична инсталација. Истите извори посочија дека надлежните сакаат да го прикријат случајот за да не излезе во јавноста.
НОВА се обрати во Центарот за дијализа во Чаир за да ја провери информацијата. Таму ни беше соопштено дека имало само дефект на апаратот додека пациентот бил на дијализа, но не и палење на апаратот. За подетални информации не упатија на Клиниката за нефрологија. Објаснување побаравме од директорот Александар Шиколе:
– Тоа е ноторна невистина, работиме со полн капацитет, а имаме и адекватни апарати за дијализа. Станува збор за провокација и клевета со зли намери изјави за НОВА д-р Шиколе.
Во телефонскиот разговор со него тој нагласи дека медиумите и некои злонамерни пациенти намерно прават сценарио со кое ќе се оцрни работата на центрите за дијализа, како и на Клиниката за нефрологија.
Од друга страна само пред десетина дена пациенти од истиот центар кои ги анкетираше НОВА по завршување на дијализата се пожалија на лошите подримски услови во кои се одвива дијализата и на старите апарати кои често се расипуваат.
Од здружението Нефрон пак, обвинија дека сеуште не ги добиле 200 нови апарати кои пред две години им ги вети министерот за здравство и покрај тоа што за потребите на болниците беше набавена скапа и софистицирана опрема во вредност од 100 милиони евра.
Инаку, пред неколку години во Центарот за дијализа во Чаир се урна таванот кој падна врз главите на пациентите. При инцидентот со повреди на главата и телото се здоби пациент додека ја вршел дијализата. Надлежните и тогаш се обидуваа да ја минимизираат ситуацијата.