Поранешниот главен извршен директор во „Т-мобиле“, Жарко Луковски утринава бил да даде исказ во Обвинителството за гонење организиран криминал, дознава НОВА.
Според наши информации Луковски сам побарал да го дополни исказот кој претходно го дал во случајот „Рекет“.
Кога се отвори истрагата за „Рекет“ меѓу повиканите во Обвинителството бил и Луковски. Тој бил повикан како сведок.
Луковски се споменува во еден од аудио разговорите што ги објави италијанскиот весник „Ла Верита“. Боки 13 во разговор со Орце Камчев вели дека Жарко Луковски завршил работа за случајот со базните станици – и во СЈО и во Владата.
Во случајот „Базни станици“ што во СЈО го води обвинителката Лиле Стефанова, Жарко Луковски е осомничен за злоупотреба на над 3,5 милиони евра во корист на Бетон АД Скопје, а на штета на акционерите на Т-мобиле, меѓу кои, и државата. Според СЈО, тој во 2011 ја злоупотребил службената положба и овластување како главен извршен директор на Т-мобиле, барајќи финансиска понуда од Бетон АД Скопје за легализирање на дивите базни станици, иако Т-мобиле Македонија поседувала соодветен тим на стручни и лиценцирани лица, кои и претходно работеле на утврдување на правниот статус на базните станици и тоа за околу 3.000 евра по објект. Од друга страна, Бетон АД Скопје претходно никогаш немала давано услуги од овој вид, а во фирмата постоел само еден вработен со соодветното искуство. Сепак, набрзо Бетон ја известил Т-мобиле дека бараната услуга може да ја изврши за тројно повисока цена од онаа за која работата можела да ја заврши стручниот тим на Т-мобиле Македонија.
Од СЈО велат дека истрагата под ова кодно име, иницирана во октомври 2018 година, се уште е отворена. Активности нема поради начелното правно мислење на Врховниот суд дека СЈО е неовластен тужител во сите предмети за кои не е покренато обвинение до 30 јуни 2017.