Снимката на старецот од Пустец, односно Центар кој за малку ќе излеташе од возилото додека неговиот шофер набрзина бегаше од камерата на НОВА беше и една од највознемирувачките.
НОВА истражуваше чиј е овој автомобил. Автомобилот во полиција е регистриран на адресата Партизанска 18, влез број два, стан број два на името Влатко Камчев. Случајно или не, на истата адреса живее и Борис Камчев, координатор на средношколската унија на млади сили на ВМРО ДПМНЕ.
Младиот Камчев не одговораше на повиците за да ни раскаже како се случи семејната кола да ги развозува новите сограѓани од општината во која и тој живее.
Чии беа автомобилите е едното прашање, но чии се становите на кои се издадени личните карти е другото важно прашање.
На некои од адресите се сместени дури и државни институции. Како на пример Илиндеска 63. Тука е сместена Државната комисија за жалби и поплаки по јавните набавки. Горниот спрат од куќата е руиниран и напуштен и тешко е замисливо дека жителите регистрирани овде успеале да докажат во МВР дека тие навистина живеат овде.
На списоците е и зградата број 18 на улицата Васил Ѓоргов. Во станот број 69 живееше Ѓунер Исмаил со семејството. Јавното претпријатије за стопанисување со станбен и деловен простор му го одзема општествениот стан на Исмаил во 2011 година веднаш по изборите, за што семејството води и судски спор кој се уште трае. Ова е само една од адресите во општина Центар на која во предизборниот период лични карти добија стотици луѓе од Пустец. Сите луѓе се регистрирани во избирачкиот список. И ова е општествен стан.
Директорот на јавното претпријатије за стопанисување со станбен и деловен простор Цветко Грозданов отфрла секаква вмешаност на претпријатието во врска обвинувањата на опозицијата дека ова се општествени станови.
„Јавното претпријатије не учествува во таквите проекции и отфрламе секакви шпекулации дека ние сме дел од тоа. Сите договори за закуп на претпријатието може да се проверат и да се види дека се е јасно и согласно процедурите и законите. МВР е одговорно за издавање лични карти.
-Ако ви доставиме адреси на станови вие ќе одговорите кои се, а кои не се во сопственост на јавното претпријатие? Пратете, ќе видиме дали може да ви одговориме, вие верувам ги познавате законите”, ни одговори Грозданов.
Во МВР одговори немаат, освен тој дека секоја лична карта е издадена согласно процедурите, а ако ние сакаме да ни одговорат конкретно за одредена лична карта да бараме написмено и доколку законот дозволува ќе одговорат.
„СДСМ обвини луѓе дека се граѓани од Пустец на адреси во Скопје. Ние потоа откривме дека тие се студенти на размена од Турција. Да, повеќе луѓе имаше на адресата, двајца беа студенти, ама беше дојден и таткото на еден од студентите. Не би можел да кажам на кој факултет студираат, ама ќе проверам и ако најдам ќе ти кажам”, вели Иво Котевски во разговор со НОВА.
Според процедурите и законите објавени на веб страницата на МВР, за да добиете лична карта треба да пријавите живеалиште. За да го направите тоа, треба да имате докази дека тоа е ваш стан или пак да приложите договор за закуп, но и да ја докажете вашата намера постојано да престојувате во земјата, односно потврда дека сте вработен, потврда дека децата ви посетуваат училиште во местото каде пријавувате живеалиште или докас дека сте сопственик на фирма во Македонија и слично.
И директорот на јавното претпријатие и портпаролот на МВР не упатија во обвинителството доколку имаме докази и се сомневаме дека некоја лична карта е издадена надвор од процедурите.
Во видеото погледнете го целиот прилог, а подолу прочитајте го процедурите на МВР објавени на нивната веб страница за тоа како се пријавува живеалиште во Република Македонија.
КАКО И КАДЕ ТРЕБА ДА ГО ПРИЈАВАМ СВОЕТО ЖИВЕАЛИШТЕ?
* КАКО: Треба да ги поднесете следниве документи:
1. Барање (кое ќе го добиете бесплатно во Министерството за внатрешни работи).
3. Доказ за Вашата намера постојано да престојувате во Република Македонија (ова може да биде прикажано на повеќе начини, на пример потврда дека сте вработени, потврда дека децата ви посетуваат училиште во местото каде што го пријавувате живеалиштето, доказ дека сте сопственик на фирма во Република Македонија итн.)
4. По службена должност се прибавува препис од матичната книга на родените,
5. Обезбеден вселив стан:
• Документ дека станот е Ваша сопственост или пак договор за закуп на стан во согласност со закон, заверен кај нотар.