Од истражувачката редакција на НОВАТВ
Мал круг на луѓе наголемо тријат раце во Штип. Спортот е повод, мотивот се пари. Се продава фудбалскиот клуб Брегалница. Иако немаше најава за отуѓување на градското милениче, неофицијалната чаршиска вест беше дочекана еуфорично затоа што конечно се нашол фиљан човек кој е заинтересиран да вложува во потпросечна фудбалска екипа во македонски услови.
Подоцна одлуката за продажба на клубот ја официјализираше лично градоначалникот на Штип, Илчо Захариев, кој од Советот на општината побара истата да се стави како точка на дневниот ред.
Првиот дел од ова истражување открива дека постапката за продажба на овој клуб е нетранспарентна, дека новите газди стасаа пред воопшто да биде објавен огласот за продажба, а на големо се носат играчи и тренери.
Кој ја сака ФК Брегалница
ФК Брегалница е во стопроцентна сопственост на Градот Штип. Градот најпрво сакаше да го продава клубот на јавен оглас. По реакциите на локалните советници од опозициската партија СДСМ, локалната власт објави дека наместо продажба на јавен оглас, клубот ќе се нуди на берза со номинална вредност од 25.000 евра или 10 евра по акција. Така општината сега ги продава акциите, кои се уште не се во оптек, но на потенцијалниот понудувач му се нудат по 10 евра акција и обврска од минимум годишно вложување од 300.000 евра за период од една деценија. Одлуката помина на Советот, а градоначалникот Захариев го задолжија да формира комисија за спроведување на постапката за продажба на комплетниот пакет акции на еден најповолен понудувач.
Навидум сè е согласно законот, но само ако не беа гласините дека од неодамна купувач од Турција веже му фрлил око на клубот. Ова беше повод за НОВАТВ да истражи што се крие зад оваа фудбалска „бомба“ под Исарот.
Допрва ќе се продава, но се чини таксана
На крајот на август во Штип во темно сино „Порше“ пристигна нов тренер од Турција во „Брегалница“. Штипјани на шега велат дека Јиксел Јесилова е нешто како јамб во најава за потенцијалниот нов газда на Ф.К. Брегалница. Зделката, според официјалните документи, се уште не е реализирана. Единствено е утврдена одлуката за продажба, но од општина Штип потврдија дека до денес се уште не е формирана комисијата за продажба, ниту пак е објавен огласот.
Интересот за оваа приказна започна кога на Фесјбук страницата „Штипски асови“ која третира настани од регионалниот спортски живот во Источна Македонија беа објавени серија статуси во кои што пренесуваат изјави на новиот турски тренер. Освен ветувањата дека ќе ја однесе „Брегалница“ во Европа, тој во една изјава кажува и кој го пратил во „Брегалница“.
„Дојдов во Штип на барање на големиот бизнисмен од Истанбул, Озгун Ајден, и на Тони. Дојдов да работам и да сменам некои работи во Брегалница. Сакам да го вратам фудбалот во Штип. Не случајно задоцнивме една недела. Јас имав свој помошник кој дојде во Штип и ги следеше тренинзите на Брегалница. Ќе стартуваме веднаш, со моите помошници Неан Тукмаја и Ерџан Баж.“, вели тренерот
Извор во општината за НОВАТВ вели дека не само што е пристигнат тренерот, туку непозната маркетинг агенција од Турција, според документите кои изворот ни ги приложи, веќе купува и странски играчи. Донесени се пет странски играчи за кои што се уплатени и пари во Фудбалската федерација на Македонија (ФФМ). (Според правилата на ФФМ за странските играчи се плаќа финансиски паушал). Извори на НОВАТВ во општината велат дека парите за играчите се уплатени од извесна маркетинг агенција со назив „Reflex Menajerlik Sportif Faaliyetler“ и седиште во Турција.
За оваа агенција не постојат доволно информации на интернет. Тие немаат своја веб страница, а единствено се наоѓаа по некоја штура информација за нивното седиште кое е во Истанбул, а се споменуваат и во една статија каде што се набројуваат кривични пријави против дузина директори и фудбалери од 2010 година.
„Можеби парите за странските играчи ги платила Брегалница, а можеби Турчинот“, овој одговор го добивме во ФФМ откако прашавме кој точно ги уплатил парите за новодојдените. Иако не споменавме никакви Турци, од ФФМ ги споменаа и нив како можни уплатувачи на средствата.
Сето ова отвори дилеми околу транспарентноста на постапката за продажба. Зошто некој би купувал играчи за клуб кој не го поседува? Зошто Турците би испраќале и тренер и засилување во „Брегалница“, а се уште не се отворил ни огласот за продажба. И дали секој заинтерсиран инвеститор за купување на клубот може да си донесе играчи и тренери за да го тестира. Последново прашање се роди по кусиот и непријатен разговор со градоначалникот на Штип Илчо Захариев кој рече дека Турците се овде за да го проверат теренот.
„Клубот ќе се продава на берза. Новиот тренер е дојден за да ја испита неговата кондиција. Тоа е се, готово, со здравје, пријатно“, рече Захариев и го прекина разговорот, по што не бевме во можност да ги поставиме останатите прашања.
Брегалница ја продавале поради долгови од кредити
Дали е веќе таксана Брегалница и огласот ќе биде само формалност, или пак, општината навистина има уникатен пристап кон потенцијалите инвеститори и им овозможува да тестираат со тренери и играчи пред да ја купат, оваа дилема допрва ќе биде одговорена откако ќе се објави огласот за продажба.
Од официјалните информации единствена е онаа која ја придружува одлуката на Советот на општина Штип за продажба, а во која се вели дека клубот се продава за општината да може да скрати од трошоците, за што била задолжителна со судска пресуда поради кредит од 2 милиони евра на Европската банка за обнова и развој – пресуда со која на општината и се наложува да ги редуцира трошењата за да може да си ги исполнува обврските кон кредиторите.
Оттука произлегува најчесто поставуваното прашање што ќе биде со клубот во што се содржани многу дилеми и неизвесност. Конкретен одговор од надлежните нема што само ги подгрева тезите дека тоа што се подготвува треба да се чува што подалеку од досег на јавноста. Или навистина клубот ќе тежнее кон висок пласман дома и излез во Европа или во позадина ќе бидат матни игри, велат за НОВАТВ луѓе блиски до клубот.
Кој всушност ќе ја купи фудбалската екипа која во своето досие нема запишано ни еден успех. Без првенства или куп титула, без учество во финале, без европско искуство и играње колку да се опстане во Прва лига.
продолжува…