Нема крај на катастрофалните изданија на МЗТ Скопје во АБА лигата во оваа сезона. Но, денешното против Петрол Олимпија во СЦ „Јане Сандански“ беше врв на очајот на аеродромци во регионалното кошаркарско натпреварување. Македонскиот првак загуби од словенечкиот со 55:96 што претставува најубедлив пораз на домашен терен во досегашните шест сезони колку што е дел од Јадранот.
Составот на Жељко Лукаиќ имаше две различни полувремиња во својот дом. Иако беше блед по воведните два периода, сепак, замина на одмор со два поена предност – 39:37 (15:18, 24:19). Меѓутоа објаснување за настапот во наредните две четвртини едноставно нема. Гостите од Љубљана ја добија третата со 28:5, а потоа ги дотолчија домаќините со 31:11 во последната за конечен триумф со 41 поен разлика.
Екипата на МЗТ Скопје од поодамна е закована на дното на табелата каде ќе остане и на крај на регуларниот дел од шампионатот. Бојан Трајковски и Дамјан Стојановски постигнаа по 12 коша за аеродромци, Џордан Морган со 16 поени, Девин Оливер и Роко Баџим запишаа по 15 како најефикасни кај Петрол Олимпија.