Лидерската средба ќе се одржи во понеделник со почеток во 9 часот, потврдија владини извори за НОВА.
Премиерот Зоран Заев упатил покани до лидерите на ВМРО-ДПМНЕ, ДУИ и Беса за лидерска средба.
На дневен ред е составот на ДИК, референдумското прашање, датумот на референдумот, но и условите на ВМРО-ДПМНЕ закон за финансирање на партии, измени во законот за Влада и измени во Кривичниот законик се очекува да се најдат на маса меѓу политичката четворка.
По последната лидерска средба не беше постигнат договор околу клучните прашања кои треба да го одблокираат процесот на формирање на ДИК и потоа за одржување на референдум за Договорот со Грција и за интеграција на Македонија во ЕУ и НАТО.
Премиерот и претседател на СДСМ Зоран Заев по лидерската средба во петокот изјави дека разговорите траеле долго и на нив тема биле прашањата кои се суштински поврзани со референдумот, а со тоа и со формирањето на ДИК.
Заев не сакаше да навлегува во детали за кои прашања конкретно ставовите се приближени, а за кои и натаму има големи разлики, туку најави дека на следната средба ќе се разговара сé додека не биде постигнат договор.