Паралелно со конгресот на СДСМ во мај, Владо Бучковски во интервју за Дојче Веле најавува формирање и промоција на нова партија.
„Таа ќе биде промовирана во мај. Се работи за крајно сериозен проект, за партија со граѓанска опција за европска Македонија.“
– Јас сега не сакам да го контаминирам процесот како нејзин гласноговорник. Тоа ќе биде коалиција од видни интелектуалци и претставници на бизнис заедницата.
– Сега бараме поддршка од меѓународната заедница, бидејќи во овие околности за било што е потребна поддршка од нејзините претставници.
– Тоа е и доволен доказ дека новата партија не е диригирана од власта и дека нема да биде сурогат на СДСМ, вели Бучковски во интервјуто за Дојче Веле.
Бучковски објаснува дека засега неговото учество во таа партија е, сепак, “ставено во лер”, бидејќи го чекал исходот од мајскиот конгрес на СДСМ и се уште бил оптимист дека постои можност за демократизација на СДСМ.
“Не подразбирам само заминување на Бранко Црвенковски од лидерската функција. Тоа не е доволно и нема да го реши проблемот. Таму треба да се смени досегашната матрица на размислување и однесување и да се цени квалитетот, а не поданичкиот однос кон лидерот. Кризата раѓа лидери, но и уништува лидери.
– Правилото „еднаш лидер – секогаш лидер” не поминува. Се покажа тоа преку примери во регионов и во соседството. А, ако СДСМ ги врати навистина и пратеничките мандати ќе предизвика и серија глупости, по што партијата ќе биде маргинализирана. Судбината на ПАСОК ќе стане и судбина на СДСМ”, објаснува Бучковски.