Српскиот премиер Ивица Дачиќ и косовскиот, Хашим Тачи, денеска ќе остварат средба за новата рунда преговори помеѓу Белград и Приштина со високата претставничка на ЕУ, Кетрин Ештон. Главна тема на преговорите ќе биде формирањето на Заедница на српските општини.
Разговорот помеѓу Тачи и Ештон е веќе започнат, информираат српските медиуми.
Денешниот состанок е во пресрет на извештајот на Ештон за дијалогот и клучниот состанок на Советот на ЕУ, закажан за 17 декември, на кој шефовите на дипломатиите на земјите членки ќе го дадат конечното мислење за датум за прва меѓувладина конференција, која ќе ги означи формалните почетоци на преговорите со Србија.
Како и што е предвидено, првиот билатерален состанок на Ештон ќе биде со косовскиот премиер Тачи, а подоцна и со премиерот на Србија, Ивица Дачиќ.
Потоа би требало да следи трилатерален состанок.
Како што Ештон изјави вчера, претседателот на владата на Србија, Ивица Дачиќ, и косовскиот премиер Хашим Тачи ќе разговараат за понатамошните чекори во спроведувањето договор за нормализација, од април годинава.
„Ова е особено важно во пресрет на моето претставување на новиот извештај за дијалогот во Советот, во декември“, нагласи Ештон.