На Јутјуб се појави нова аудио снимка на која се слушаат гласовите на Миле Јанакиески и Игор Јанушев од ВМРО ДПМНЕ. Во снимениот телефонски разговор тие координираат за списоци со гласачи.
„МИОА наводно списокот што си го внесол ти како МИОА немало врска со нас“ вели Јанакиески, а Јанушев иронично одговара „сигурно“.
„Шефе, 20 луѓе има што се бележени како МИОА, значи тие што се бележени 20, ако дале 100, значи 80 се покопуваме“, вели Јанушев во снимката.
„На работа сме, куцаме табели, последно имаме осум“, вели Јанушев во втората објавена снимка. На тоа Јанакиески прашува до која бројка ќе дојдат, а Јанушев одговара „околу 9 е најреално“.
Од она што се слуша на снимките е сериозна индиција за притисоци врз вработени во јавна администрација, конкретно во Министерството за информатичко општество како и за изборни нерегуларности.
Признанието на Јанушев дека бил на работа и „куцал табели“ со гласачи покажува дека тој во работно време се бавел со партиски задачи. Иако не се знае кога е точно направена снимката, лесно е да се погоди дека Јанушев табелите ги правел или во ЈСП Скопје каде беше директор од 2015 до 2017 или во Министерството за транспорт и врски каде работеше пред да стане директор.
Јанакиески своевремено беше Министер за транспорт и врски во Владата на Никола Груевски, Јанушев во моментов е носител на изборната единица три од ВМРО ДПМНЕ.