Новата концертна сала на местото на постојната Универзална на „Партизански одреди“, во име на градот, но со буџетски пари, целосно ќе ја гради Министерството за култура, а потоа објектот ќе и го пренесе во сопственост на градската власт, се вели во одлуката, која вчера беше на дневен ред на Советот на Скопје, информира Дневник.
Во неа пишува дека локалната власт се одлучила целосно да го пренесе правото за градење на Владата поради неможност да обезбеди доволно пари за реализација на овој капитален проект.
Според процените на Владата, кои не се конечни, за изградба најверојатно ќе бидат потребни околу 14 милиони евра. Повикот за изведувач се очекува до крајот на годинава, но активностите би траеле неколку години.
Пред почетокот на градежните работи, градските власти ќе склучат договор со Министерството, со кој ќе ги уредат меѓусебните односи во врска со реализацијата на новата сала.