Првичните неофицијални податоци покажале зголемено присуство на афлатоксин во новите пратки на млеко на Имлек, Маестро –Ниш и Шабац дознава НОВА. Досегашните анализи покажале дека најмногу контаминирани се српските млека, но зголемно присуство на афлатоксин е пронајдено и во неколку вида на млеко од Хрватска и Босна и Херцеговина.
Од Агенцијата за храна и ветеринарство доцна попладне за НОВА потврдија дека се ова прелиминарни резултати и дека целото млеко е ставено во магацините, така што ниту еден литар не се нашол на рафтовите во продавниците.
Досегашните испитувања покажале и дека во ниту едно словенечко и германско млеко не пронајден опасниот афлатоксин.
Откако изби аферата со канцерогеното млеко во Македонија се проверува секоја пратка на млеко од увоз, а домашните производители со минатонеделните измени во правилниците се задолжени да поседуваат декларација со која ќе потврдат дека се вршат редовни контроли за присуство афлтоксин во нивното млеко.
Поради ваквата состојба во регионот министерот за земјоделство на Србија планира на 5 март да ги свика своите колеги од регионот за да разговараат за безбедноста на храната. На состанокот Србија и Хрватска најверојатно ќе потпишат договор со кој земјите од регионот ќе одредат една заедничка лабораторија од ЕУ каде ќе се изработуваат анализите за земјите од целиот регион.
Србија веќе затвори 31 фарма поради тоа што во нивното млеко е пронајдено зголемено ниво на опасниот афлатоксин М1. Таму веќе се детоксицираат кравите со минералот зеолит, заради контаминираната пченка која била употребувана во исхраната. Македонија минатата година увезла 64 000 тони пченка од која најголемиот дел е од Србија.
Иако во оваа соседна држава беше потврдено дека 80 проценти од пченката е канцерогена, домашните млекопроизводители велат дека многу малку ги хранеле кравите со увозната пченка, а повеќе со силажа и луцерка која е исклучиво од домашно потекло