Францускиот институт во Скопје е прва образовна институција во Македонија која ги воведе, од пред неколку години, новите технологии за информација и комуникација во наставата, преку употреба на бели интерактивни табли, компјутери и дигитални платформи.
Благодарение на посебен фонд доделен од Францускиот институт во Париз, Мултимедијалниот простор за настава на Францускиот институт располага сега и со таблети за учениците по француски јазик.
На 1 и 2 октомври во Скопје се оддржа обука за професорите во Институтот и Француските Алијанси, на тема интегрирање на новите технологии преку употреба на таблети во наставата, со цел користење на оваа алатка на педагошки план, како и воведување на интерактивни и забавни пристапи кои поттикнуваат поефикасно учење. Обуката ја водеше Марк Оду, експерт во областа на новите технологии на час по француски како странски јазик.
Таблетите нудат огромен потенцијал во доменот на наставата и изучувањето и нивното користење има голем број на предности кои професорите ги открија во текот на оваа обука.
Предности:
1. Мноштво од алатки се собрани во една единствена алатка: фото апарат, камера, читач на МП3, МП4, диктафон, класер на ресурси и материјали, бела (интерактивна) табла, како и многубројни едукативни апликации достапни на симнување кои овозможуваат реализирање на активности во креативен и забавен контекст.
2. Користењето на таблетите на час овозжува да се промени традиционалната позиција на професорот во наставата. Благодарение на безжичната технологија, професорот може слободно да се движи во училницата, да биде во директен контакт со учениците, да ги ориентира и советува во реализирањето на активностите. Професорот не е повеќе дистрибутер на знање, туку советник и водич.
3. Користењето на таблетите на час ја олеснува врската помеѓу јазичните и комуникативни активности во резлизирањето на педагошки проекти и задачи. Водењето на колаборативни проекти им овозможува на учениците да бидат активни чинители на нивното сопствено учење, нивната импликација поттикнува подобро изучување.
4. Таблетите овозможуваат моментален пристап со сите ресурси и материјали креирани од страна на професорот благодарение на “cloud” технологијата или складирање он лајн. Професорот може да ги покаже своите материјали на учениците, да ги сподели, да пристапи до изработките на учениците, да ги коментира или изложи пред другите ученици. На тој начин и дигиталната библиотека Culturethèque се валоризира и покажува како многу корисна.
5. Функцијата на снимање и слушање прави од таблетите вистински јазични лаборатории.
Во текот на дводневната обука и преку конкретни активности, професорите можеа да ракуваат со таблетите, да ги откријат нивните функционалности и палета на апликации кои овозможуваат работа на сите четири јазични компетенции преку активен приод во наставата и да реализираат колаборативни проекти.
Апликациите кои ги открија во текот на оваа обука им овозможуваат да водат на час разновидни активности, како на пример креирање на стрипови, интерактивни книги, ментални карти за објаснување на вокабулар, граматички делови или презентирање на идеи, забавни тестови он лајн, приказни, анимирани презентации, филмови, видео капсули, да водат заеднички проекти он лајн помеѓу самите ученици, да ги споделуваат едукативните ресурси и материјалите, да комуницираат со учениците и надвор од училницата, итн. Брзи за употреба, самостојни, лесни, едноставни за употреба, мобилни и интуитивни, таблетите се ценети како алатка од страна на учениците и истите го менуваат ставот на учениците правејќи ги поактивни, поимплицирани и креатори на нивното сопствено учење.
Заклучок:
Таблетите ја збогатуваат педагошката практика на професорите. Нивниот вистински потенцијал се состои во фактот што тие претставуваат идеална алатка за продукција на содржини кои им овозможуваат на професорите да водат “превртена училница“ (classe inversée) со цел поттикнување на активна и самостојна мисла кај учениците.