Новинарот Ерол Ризаов од „Утрински весник“ е добитник на годинашната награда „Жан Моне“ за најдобар новинарски напис на тема ЕУ која ја доделува Делегацијата на Европската Унија во Македонија. За најдобра репортерска фотографија е награден фоторепортерот на „Вест“ Борис Грдановски, а за аматерска фотографија Марија Биковска.
Наградите денеска ги врачи евроамбасадорот Аиво Орав во просториите ЕУ-инфоцентарот.
Авторите на најдобриот новинарски напис и на најдобрата репортерска фотографија покрај статуетка и диплома, добија и парична награда од по 1.000 евра, додека најдобрата аматерска фотографија доби диплома и 500 евра.
Жирито што ги оценуваше пристигнатите трудови беше составено од претставници на Делегацијата на ЕУ, на владиниот Секретаријат за европски прашања и на академската заедница, како и професионален фоторепортер – добитник на минатогодишната награда „Жан Моне“.