Во Веле Поле, просторот во населбата Ѓорче Петров, каде што треба да биде изграден новиот Клинички центар во моментот нема никакви активности. Во Општина Ѓорче Петров потврдуваат дека е донесен само Урбанистичкиот план, а се друго околу инфраструктурата е предвидено во тендерската постапка во Министерството за здравство.
„Донесен е урбанистичкиот план, следниот чекор е сообраќајницата. Но, се останато како што е идеен, главен проект и се друго, е во надлежност на Министерството за здравство“, изјави за НОВА, Александар Наумовски градоначалник на Општина Ѓорче Петров.
Постапката со тендерот во моментот е втора фаза на дијалог и во ресорното Министерство велат дека не може да знаат колку ќе трае бидејќи целиот процес е многу комплициран.
Премиерот Заев тврди дека Министерството за здравство реалоцира средства на Општина Ѓорче Петров, на Град Скопје, на Јавното претпријатие за државни патишта, како и на други јавни претпријатија за да се создадат услови за пристапен пат со клучка, за водовод и канализација, за спроведување на гас, како и на електрична енергија.
„Се тоа се подготвува и се создаваат услови за да може на пролет да почне изградбата на Клиничкиот центар“, изјави премиерот Заев.
НОВА го праша премиерот Заев дали тоа значи дека рокот до јануари кој го најави министерот Филипче ќе биде пролонгиран.
„Не, инфраструктурата од јануари, февруари верувам дека ќе може да почне. Секако мора да го вкалкулираме тука и правото на жалба и додека не заврши правосилноста на сите постапки не ни може да започне изградбата. Ние сме пред избори и јас би сакал пред избори да почне изградбата, но секако постапката правно формално ќе ја задржиме до крај, а после тоа да започне изградбата како на инфраструктурата, но и почетокот на изградбата на огромниот Клинички комплекс“, изјави премиерот Заев.
Тој смета дека предвремените избори закажани за 12 април нема да ја закочат постапката за изградба на новиот Клинички центар и нагласи дека се консултирал со правници за да се види што е дозволено за време на техничка Влада, по што се констатирало дека изборите нема да ја запрат изградбата на Клиничкиот центар.
„Одржавме состаноци со правниците ги видовме сите дозволиви и недозвливи работи за време на техничка влада, 40 дена пред избори, 20 дена пред избори во кампања и видовме дека нема ништо да застане во ваквите сериозни постапки на избор на изведувачи. Паралелно се движат постапките за кредитната линија со Министерството за финансии, а Министерството за здравство ја заврши првата фаза во делот на технички дијалог со заинтересираните . Постапките очекуваме да завршат околу или после Нова година“, рече Заев.
Новиот Клинички центар власта одлучи да го гради на локацијата „Веле Поле“ со површина од 20 хектари државно земјиште, кое се наоѓа во близина на обиколницата, а образложението беше дека просторот е избран заради брзиот пристап од сите страни.
На почетокот на август годинава Министерство за здравство го распиша тендерот за изградба на новиотКлинички центар на грин-филд локација по моделот „клуч на рака“ со поддршка при менаџирање на проектот.
Според концептот на договорот изградбата треба да се врши во три фази, а право на учество на тендерот имаа домашни и странски компании. Рокот за реализација е 90 месеци.
Станува збор за проект вреден 500 милиони евра и во моментот е најголема инвестиција во државата. Финансиските средства ќе се обезбедат преку заем од конзорциумот Рајфајзен банк, ЕрстеГруп и УниКредит.