Австрија го доби најмладиот Министер за надворешни работи во Европа. Неговото име е Себастијан Курц и има само 27 години.
Курц ги стави на „пауза“ своите студии на право на 25 години и за него денес многумина мислат дека ќе биде идниот канцелар на Австрија. Досега веќе бил државен секретар за интеграција и општински советник во Виена. Курц од 2009 година е шеф на младите на конзервативната партија. Велат дека е добар говорник.
Курц е син на професорка и инженер и на училиште одел во средина каде што неговите соученици во голем дел биле деца на имигранти, во квартот Мејдлинг во Виена. Оттука, вели тој, доаѓа неговиот сензибилитет кон овие прашања.
Кога станува збор за имиграцијата во Австрија, една од главните теми на неодамнешните избори, Курц својата политика одлучи да ја базира врз „интеграција преку успех“. Тој смета дека „луѓето кои овде живеат се дојдени легално. Тие треба да бидат оценувани преку напорите за учење, вработување и граѓански ангажман а не врз основа на нивното потекло“.
Помеѓу мерките на Курц најмногу успех има онаа за воведување на задолжителни часови по јазик во градинките за децата кои не го знаат германскиот или обврската за муслиманските свештеници да ги читаат молитвите на германски. Курц е иницијатор на изработката на извештај за интеграција кој содржи 20 мерки за подобрување на ситуацијата.
За време на изборната кампања Курц имаше и неуспешни но атрактивни акции. Така, Курц ја почна својата кампања во една виенска дискотека и возеше црна кола на која беше напишан слоганот „Schwarz ist geil“ која во превод значи дека дека „црното е кул“ или „возбудливо“ според двојното значење на зборот „geil“. Целта на акцијата беше да се оцрни кампањата на екстремната десница која успеа да добие голем дел од гласачите во дискотеките и ноќните клубови. Набљудувачите велат дека оваа кампања не го постигнала својот резултат.
Курц се разбира има свои Фејсбук и Твитер профил на кои веќе пристигнуваат честитки за новата функција на кои одговара самиот Курц. Една од првите честитики дојде до неговиот шведски колега Карл Билд на кој Курц му вети набрзо средба, штом положи заклетва како министер.
Во Австрија се одржаа избори во септември а на нив победата ја однесоа традиционалните партии – социјал-демократите и конзервативците кои ја делат власта повеќе децении. Годинава тие добија низок резултат а екстремната десница доби над 20 отсто од гласовите.