ОБСЕ денеска излезе со голем број забелешки за владиниот нацрт-закон за медуми, кој во целост соодветствува на забелешките на ЗНМ, Синдикатот и МИМ, кој денеска како документ беше врачен на македонските власти.
Дел од препораките се следниве:
ОБСЕ целосно ја отфрла идејата, или поточно, законската одредба за регистрација на медиумите, печатени и електронски, со зборовите- таа треба да биде избришана. Образложението е дека регистрацијата целосно може да ја загрози слободата на медиумите.
Понатаму, дефиницијата на електронски публикации (интернет портали, блогови и сл.) се смета како за премногу широка и оттука ризикот за ограничување на слободата на медиумите.
Дефиницијата на уредник и на новинар се отфрла, саморегулацијата и формалната регулација се смета дека не се соодветно регулирани и оттука ја замаглуваат разликата и со тоа и ограничувачки карактерот на саморегулацијата.
Слободата на изразување се смета дека како дефиниција остава простор за ограничувања.
Претставникот на ОБСЕ за слобода на медиумите, Дуња Мијатовиќ, денеска изрази загриженост дека новиот предлог-закон за медиуми и аудиовизуелни медиумски услуги ќе ја ограничи слободата на медиумите во земјата.
“Постојат голем број на прашања на загриженост во сегашниот нацрт-закон, како што се ризикот од преголемо регулирање и непотребни ограничувања што ќе се однесуваат и на онлајн и офлајн медиумите (традиционалните, наша забелешка). Ако се имплементира, овој закон може да ја ограничи слободата на медиумите во земјата “, рече Мијатовиќ.
Таа го поздрави фактот дека властите се подготвени да се разгледаат коментарите и препораките за нацрт-законoт.