Предлог Законот за аудио визуелни медиумски услуги конечно ќе се најде и на собраниска седница, откако цели десет месеци беше заглавен во Комисијата за транспорт и врски. ВМРО ДПМНЕ поднесе 60 амандмани, но расправата по нив одеше бавно поради долгите дискуии на пратениците од опозицијата.
Во меѓувреме власта и опозицијата успеаа да се договорат и денеска за само неколку часа на Комисијата за транспорт и врски помина расправата по најголем дел од амандманите.

„По подолго време конечно имавме конструктивна дебата. Имаме шанса за реално подобрување на состојбата во медиумите и состојбата во МРТ и да ги надминеме времињата кога имавме сериозни проблеми со медиумите и демократијата во Македонија“ изјави министерот за информатичко општество Дамјан Манчевски.

„ВМРО ДПМНЕ не сака да биде окарактеризирана како кочничар на реформите кои треба да се направат во медиумите, даваме можност законското решение да биде имплементирано со тоа што дел од нашите зебелешки кои беа потенцирани во јавната расправа беа прифатени“ рече Лилјана Затуроска пратеник од ВМРО ДПМНЕ и претседател на Комисијата за транспорт и врски.

На предлог на ВМРО ДПМНЕ во новиот Закон е пролонгиран рокот за избор на нови членови на Советот на МРТВ – огласот за пријавување на кандидати ќе трае 30 дена, по што ќе следува и  нов рок од 30 дена за избор на кандидатите. Ова остава простор изборот на нови членови на Советот на МРТВ да се случи дури по претседателските избори, кој треба да се одржат во март.

Министерот Манчевски за НОВА кажа дека кога ќе биде изборот на нови членови на Програмскиот совет на МРТВ ќе зависи од тоа кога Собранието ќе го објави огласот за нови членови, но теоретски е можно новиот состав да се избере по изборите.

Новите членови на Советот на АВМУ и на Програмскиот совет на МРТВ ќе се бираат со двотретинско мнозинство во Собранието.

Постапката за избор треба да биде транспаретна и кандидатите својата програма ќе ја презентираат на јавна комисиска расправа на која ќе бидат поканети новинарски и невладини организации.

Советот на јавниот сервис кој е избран од претходниот парламентарен состав во февруари му доверија нов мандат на Марјан Цветковски кој ќе остане на чело на МРТ сѐ додека не се донесе новиот закон за аудио и аудиовизуелни услуги. Истото важи и за Советот на МРТ, како и за директорот на Агенцијата за аудио и аудиовизуелни услуги Зоран Трајчевски и за Советот на оваа институција, на кои мандатот би им престанал со донесувањето на новиот закон, кој предвидува сосема поинакви услови за избор на раководните функции во медиумската сфера.

Тие треба да се партиски независни – во изминативе 10 години да не биле партиски членови, да не извршувале каква било партиска функција и да имаат  работно искуство во областа на комуникологијата, новинарството, информатиката. Од Здружението на новинари ги подржуваат овие критериуми за избор за да не се повторуваат ситуации како што имавме во минатото кога портпароли на партии или партиски функционери беа членови на Советот на МРТВ и на АВМУ. Сепак, конечна оценка ќе дадат  кога ќе го видат финалниот текст на Законот.

„Ако остане истиот текст кој беше подржан од ЗНМ, ние ги подржуваме и ги охрабруваме процесот да заврши побрзо, но претходно треба да го видиме, треба да сме  претпазливи да не се вметнати одредби кои не ни одговораат“ изјави за НОВА Драги Секуловски, директор на ЗНМ.

Јавниот сервис во претходните години, беше критикуван за необјективност и за пристрасност кон поранешната владејачка гарнитура на чело со ВМРО-ДПМНЕ. За тоа како работеше МРТВ во изминатата деценија прочитајте во истражувањето на следниот линк.

Јавниот сервис МРТВ- симбол на пропагандно оружје