Во Основниот суд во Скопје денеска се одржува подготвителното рочиште за случајот Никола Груевски против Зоран Заев за „Македонска банка“.
Првично рочиштето беше одржано на 19 јуни и тогаш премиерот Никола Груевски не присуствуваше во судницата, како тужител. Денеска тој се наоѓа во посета на Кина.
Како причина за одложувањето беше наведено доставувањето на обемен доказен материјал од страна на шестчлениот адвокатски тим на лидерот на опозицијата Заев.
Премиерот Груевски го тужи Заев за наводите за поткуп од случајот „Македонска банка“ кога тој на пресконференција го обвини Груевски дека зел поткуп од 1,5 милиони евра од продажбата на „Македонска банка“, а како доказ понуди аудио снимка на која се заговара наводниот поткуп, како и тоа дека, еден од гласовите на снимката, според Заев е гласот на Никола Груевски.
Премиерот Никола Груевски од лидерот на опозицијата Зоран Заев бара половина милион евра оштета.
Инаку на 27-ми минатиот месец Јавното обвинителство објави дека нема да покрене постапка за случајот „Македонска банка“. Бидејќи, како што соопшти, нема доволно докази за да може да се отвори предмет, но и дека, и кога би имало, случајот делумно е застарен.