Македонија не само што може повторно да биде рекордер по умрени новороденчиња во Европа, туку постои опасност овој број да биде двојно поголем од лани.
Според податоците од Државниот завод за статистика само во првите шест месеци од годинава регистрирани се 208 починати бебиња, од кои 103 мртвородени и 105 новороденчиња. Според овој месечен статистички извештај, во првите три месеца 47 бебиња се мртвородени, а во второто тромесечје 56. Вкупно 46 доенчиња починале во првите три месеци од годината, а во второто тромесечје 59.
Минатата година Македонија се најде на врвот од топ листата на табелата на Еуростат, по смртност на новороденчиња, со бројка од 212 починати бебиња.
-Овие шокантни податоци од Државниот завод за статисика укажуваат дека државата не само што го надмина просекот од цела изминатата година за само шест месеци, туку тој број може да се зголемува до крајот на годината коментираат гинеколози за НОВА кои сакаат да останат анонимни.
Откако НОВА пред две недели ја објави информацијата дека Македонија повторно чекори кон врвот од земјите каде најмногу умираат новороденчиња, во Мистерството за здравство многу се вознемириле, се дигнала голема галама, по што итно бил свикан состанок на Комитетот за безбедно мајчинство од каде што ни беа потврдени информациите.
Најновите податоци од Државниот завод за статистика укажуваат дека ситуацијата е уште по алармантна. Според извештајот на Заводот за статистика од минатата година, најмногу новороденчиња умиреле во првите шест дена по раѓање, како и по првите седум до 27 дена по раѓањето. Но, фрапантен е податокот што најголем дел од нив починале од сепса и инфективни паразитски болести.
Причина за ваквата состојба гинеколозите ја гледаат во лошата здравствена политика и недостигот на матични гинеколози, како и немањето на финансиски средства за да се реализираат програмите наменети за жените во текот на бременоста.