Денеска во Скопје од Приштина ќе допатува Викторија Нуланд со цел да го демонстрира интересот на САД за состојбите во Македонија и целиот регион. Оваа порака на официјален Вашингтон има за цел да ги демантира сите шпекулации за повлекување на интересите на американската дипломатија од Балканот. Како и турнејата на германската канцеларка Меркел така и оваа турнеја на Нуланд низ регионот имаат за цел да стават јасно до знаење дека сите поважни центри во евроатлантската зона со внимание го следат развојот на состојбите на Балканот во актуелниот фрагилен контекст кој го сочинуваат: кризата во Грција, руско-украинскиот спор и неговите рефлексии врз регионот како и се уште отворените прашања во земјите од Западниот Балкан. Двете турнеи, онаа на Меркел како и оваа на Нуланд се синхронизирани дипломатски активности на ЕУ и САД со цел да се испрати јасна порака за нивниот интерес како во земјите од регионот така и до адреси во Русија, Турција и исламските држави кои во актуелните констелации пројавуваат свои интереси на различни нивоа.
Што се однесува до ситуацијата во Македонија, Викторија Нуланд се очекува експлицитно да ја соопшти пораката за интересот на Вашингтон во однос на евроатланските перспективи на Македонија што подразбира и стриктно почитување на извесни западни вредности и принципи кои се сериозно доведени во прашање особено по обелоденувањето на опозициските бомби.
Нуланд во Скопје ќе ги разочара сите кои од неа очекуваат дека Вашингтон ќе пристапи со поинаква стратегија за решавање на спорот од онаа која веќе ја спроведува ЕУ, дознава НОВА од дипломатски извори. Дипломатскиот притисок кој таа го носи во Скопје ќе биде на двете страни, како кон власта така и кон опозицијата со цел да се обезбеди што поскоро конечен политички договор врз база на документот усогласен на 2 јуни. Ваквата дипломатска активност на Нуланд имплицитно ќе ја испрати и пораката на Вашингтон дека нивните дипломатски активности се во корелација со оние на ЕУ што подразбира поддршка на актуелниот мандат на еврокомесарот Хан за решавање на политичката криза во Македонија.
Како што е познато веднаш по посетата на Нуланд во вторник во Скопје ќе допатува еврокомесарот Хан со цел да го издејствува долго очекуваниот политички договор за излез од кризата. Во меѓувреме во Брисел се поинтензивно се размислува за именување на специјален претставник на ЕУ задолжен да ја набљудува и гарантира имплементацијата на политичкиот договор за излез од кризата.