Раководството на Општина Дебар набави ново службено возило во вредност од речиси 50.000 евра. Станува збор за џип „Фолксваген Тигуан 2.0 ТДИ“ кој општината ќе го отплаќа на 5 години.
Возилото е набавено од Друштво за лизинг „Порше лизинг“ дооел Скопје.
Според објавениот договор, Општината го купува возилото со одложено плаќање по пат на финансиски лизинг со учество од 20 отсто, на рок од 60 месеци.
Градоначалникот на Дебар, Ружди Љата, кој во моментов е на службен пат, кратко за НОВА рече дека возилото било неопходно поради теренот во Дебар а претходниот автомобил, кој го вратиле, веќе бил застарен.
„Возилото е набавено со сите законски прописи и неопходно е за општината. Избрано е возилото со најниска понудена цена. Тоа возило нема да го возам јас, туку е за потребите на општината. Знаете каков е теренот во Дебар“, вели Љата.
Прашан за тоа како ја оправдува потребата за купувањето на џипот, градоначалникот потенцираше дека не очекува да има никакви реакции бидејќи дебарчани знаеле какво било претходното возило.
Ружди Љата е градоначалник на Дебар од 2013 година, а на последните локални избори, во октомври минатата година, освои втор мандат победувајќи го кандидатот на Алијансата на Албанците, Арбен Аголи.