Американското Министерство за финансии соопшти дека воведува нови санкции против Русија, пренесуваат светските агенции.
Санкциите засегаат голем број банки, меѓу кои трите најголеми во Русија: Банката на Москва, Руската земјоделска банка како и Обединетата бродоградежна корпорација на Русија.
Покрај финансискиот сектор новите мерки ја опфаќаат и руската енергетика, како и воената индустрија. Секторските санкции влијаат нафтената компанија „Роснефт”, гасната „Новатек”, државните Газпромбанк и надворешната економска банка. САД ги забрани и кредитите за Русија.
Претседателот Барак Обама ги поддржува санкциите велејќи дека Русија не презема ништо за да се нормализира ситуацијата во Украина, за чија дестабилизација клучна е интервенцијата на Москва. Тој исто така соопштил дека САД нема да испраќа оружје за Украина.
-Тие имаат подобро оружје од сепаратистите. Прашање е како да се стави крај на крвопролевањето на исток на Украина. Главна алатка со која можеме да влијаеме на руското однесување во овој момент е удар на економијата- изјавил Обама.
Според Обама, Русија и сепаратистите во источна Украина не помагаат на меѓународната истрага за трагедијата на летот MХ17 на „Малезија ерлајнс“.
Вчера и Европската унија објави дека сите држави членки постигнале консензус, за воведување нови значително построги економски санкции против Русија поради нејзината улога во дестабилизацијата на Украина и уривањето на малезискиот авион.
Ова е прв пат да се преземат сеопфатни санкции кои влијаат целата руска нафтена индустрија, финансискиот сектор, како и одбранбениот и технолошкиот сектор.