Министерката за правда, Рената Дескоска, заедно со Директорот на управата за санкции, Јовица Стојановиќ, денеска пред јавноста ги презентираа новите простории на КПУ „Идризово“ опремени по најсовремени европски стандарди.
Целиот проект за обновување и зголемување на капацитетите на затворот чини 11 милиони евра и е започнат во 2014 година. Во првата фаза изградени се два објекти од отворено и полуотворено одделение со севкупен капацитет од 546 затвореници на простор од 10 илјади метри квадратни вклучувајќи го и оворениот дел од двете згради. Во новите простории ќе бидат сместувани само ново осудувани затвореници.
-Македонија долго време е критикувана во меѓународните и домашните извештаи за несоодветните услови во затворите и со тоа за нехуман третман на лицата кои се на издржување на најтешката казна во македонското законодавство – казната затвор. Денеска повторно ги отвoраме вратите на новоизградениот дел на Казнено поправниот дом Идризово во кој можете да видите поинаква слика, слика која ветува значително подобрени услови за сместување на лицата кои издржуваат казна затвор, изјави Дескоска,истакнувајќи дека „во Идризово се сместени повеќе од 3/5 од затворениците во целата земја“.
Дескоска рече дека пренатрупаноста на затворот е клучен проблем, бидејќи се забележани ситуации во кои во оваа институција биле сместувани и повеќе од двојно поголем број на лица од предвидените капацитети.
Изградени се објекти во Отворено одделение за сместување на 294 осудени лица на површина од 3.800 м2. Изграден е објект во Полуотворено одделение за сместување на 252 осудени лица на површина од 4.000 м2. Ќелиите се за сместување на четири осудени лица, со бања, предвидени се заеднички простории за престој, работилници, фитнес сали, ќелии за лица со посебни потреби, шеталишта и игралишта. Изградена е Пречистителна станица за отпадни води.
Извршена е реконструкција на постоен објект кој се адаптираше во Тренинг центар за одржување на обуки и проверка на знаењата на вработените.
Реконструирана е административната зграда. Набавена е современа опрема за негово функционирање, односно набавена е информатичка опрема, опрема за симултан превод, кујна и мебел за сите простории во објектот.
Директорот на управата за санкции Јовица Стојановиќ одговарајќи на новинарски прашања појасни дека со грант на европската комисија судницата ќе биде префрлена од затворот „Скопје“ во затворот Идризово поради поголемиот број осудени лица кои се наоѓаат во најголемиот затвор во Македонија. Со истиот грант, додаде тој, завршена е постапката за комплетна реконструкција во затворот во Битола во кој во мај-јуни беше затворен притворскиот дел што не ги исполнува условите. Најави и воведување на пробацијата во сите затвори во Македонија, проект што треба да почне од 3 септември.
