Првите заклучоци за изминатиот втор круг на локалните избори во Македонија се продолжување на пристрасното медиумско покривање и мешањето на владините и партиски активности во изборниот процес со што се потврди недостигот од рамноправен натпревар меѓу кандидатите на терен.
На денешниот прес, шефот на набљудувачката мисијата на ОБСЕ, Герд-Хинрих Аренс истакна дека „Иако ДИК работеше транспарентно и во голема мерка ефикасно, колегијалноста брзо се наруши за време на разгледувањето на приговорите поради тоа што одлуките беа првенствено засновани на партиска припадност отколку на законот“.
„Како и првиот круг од гласањето, во вториот круг локалните избори беа ефикасно спроведени и изразено конкурентни. Меѓутоа продолжувањето на пристрасното и партиско медиумско покривање и мешањето на владините и партиските активности го потврди недостатокот од рамноправен терен за натпревар меѓу кандидатите.
– Во текот на кампањата атмосферата остана мирна, но тонот стана понегативен во некои општини. Дел од кандидатите ги обвинија своите противници за наводни незаконитости во првиот круг. Продолжија и наводите за заплашување на гласачи, особено на вработените во јавниот сектор и злоупотреба на државни ресурси “, рече Аренс.
– Недостигаат детали околу запишувањето на гласачите во избирачкиот список, водење на изборната камапња и нејзино финансирање како и медиумското покривање. Иако властите презедоа некои чекори за да се исправат недостатоците во процедурите забележани во првиот круг, останува потребата од понатамошни изборни реформи“, рече Аренс.
Конечниот извештај за локалните избори во Македонија на ОБСЕ/ОДИХР ќе биде објавен најдоцна за два месеца. Целосната оценка на изборите делумно ќе зависи од постапувањето во останатите фази од изборниот процес, што опфаќа сумирање и објава на изборните резултати како и постапувањето по евентуалните пориговори и жалби по денот на изборите.
Прашан од НОВА како го толкува податокот дека на гласачко место во Центар сретнал жители од Пустец, Аренс со одговор кој што можете да го погледнете во видеото.