Струшкото основното јавно обвинителство денеска достави обвинение против 54-годишниот гинеколог Мухамед Асани од Струга за сторено кривичното дело – давање здравствени услуги без дозвола за работа од член 304 – а од Законот за здравствена заштита.
„Како здравствен работник – доктор специјалист по гинекологија и акушерство, обвинетиот давал здравствени услуги во простор за кој немал дозвола за работа. Имено, тој во просторија во неговата семејна куќа во која живее, подготвил ординација која не била регистрирана и означена. Здраствените услуги обвинетиот ги давал од 2013 до 2020 година со тоа што ги водел контролите на бременоста на повеќе пациентки. За извршените прегледи обвинетиот наплатувал по 1000 денари од пациентките, а за примените средства не издавал никаков доказ“,стои во соопштението од Обвинителството.
При извршен надзор на Државниот санитарен и здравствен инспекторат при Министерството за здравство на 16 јануари 2020 година, било констатирано дека за опремената ординација докторот не поседувал дозвола за работа, по што му било врачено Решение со кое му било забрането во неа да врши здравствена дејност.
Инаку, Мухамед Асани беше поранешен директор на струшката болница, кој беше разрешен поради случајот со родилката од Дебар, Јилдз Веапоска која при породувањето во Струга остана без бубрег, матка и јајник. Семејството на медицинската сестра Веапоска поднесе и кривична пријава за лекарска грешка против Асани, но за увој случај се уште нема разрешница.