Градоначалникот на Гази Баба Борис Георгиевски денеска демантираше дека Александар Трајковски, обвинет во случајот Насилство во општина Центар, кој наместо на суд, денеска заминал на службено патување во Хрватска, е вработен во општината. Тој рече дека тој е дел од советничката група на ВМРО ДПМНЕ.
-Како градоначалник немам и не можам да имам информација кога одреден граѓанин има закажано рочиште на Суд. Особено за некое лице кое не е ни вработено во општината Гази Баба. Никогаш не сум имал, ниту некогаш ќе имам намера да заштитам некого. Секој оној кој извршил повреда на Законот и предизвикал кривично дело, треба за своите постапки да одговара пред судот. До сега, за овој случај никој не побарал било каква асистенција од мене, или пак информација околу неговото отсуство. Јас секогаш стојам на располагање согласно моите надлежности како градоначалник, за било каква асистенција или информација која би им била потребна на Специјалното обвинителство или Судот вели Георгиевски.
Неговата реакција следи по јавната прозивка од обвинителката Фатиме Фетаи која денеска на рочиштето за „Насилство“ во Центар побара од судот да одговори од градоначалникот за службениот пат на обвинет во случајот „Насилство“ во Центар, поради што и се одложи денешното рочиште.
Александар Трајковски, кој е обвинет во случајот на СЈО за насилството во општина Центар е член на Советот на општина Гази Баба избран на последните локални избори на листата предложена од ВМРО-ДПМНЕ.
Градоначалникот на Гази Баба вели дека патувањето во Хрватска било на предлог на советничката група на ВМРО ДПМНЕ. Покрај него во Хрватска се заминати и други седум советници од сите советнички групи, како и претставници од ЦУК и месните заедници, кои учествуваат на работилница за превенција од елементарни непогоди.
Новото рочиште за овој судски предмет е закажан за 6 јуни. Обвинителката Фетаи побара од судот почесто да се закажуваат рочиштата, бидејќи ова е најстариот предмет на СЈО, а сепак заостанува зад другите.
За насилството пред објектот на Општина Центар што се случи во 2013 година првообвинет е екс премиерот Никола Груевски. Освен него, обвинети се и ексминистерот за транспорт и врски Миле Јанакиески, пратеничката Даниела Рангелова и уште девет лица. Тие пред судот се изјаснија дека не се чувствуваат виновни. Вина признаа четвртообвинетиот Томислав Лазаров и петтообвинетиот Јордан Ристевски и добија условни казни.