Обвинителството бара притвор за 9 лица, за едно лице мерки за претпазливост а по едно лице се уште се трага, соопшти пред малку обвинителката во Обвинителството за гонење на корупција и криминал Ивана Трајчева.
Оосмничените лица веќе се приведени и за седум од нив распитот е завршен, по што ќе биде познато дали ќе бидат притворени.
Меѓу приведените се Миле Јанакиевски – екс министер за транспорт, Димитар Димовски вработен во Министерството за транспорт и член на Извршниот комитет на ВМРО ДПМНЕ и Дејан Митревски претседател на општински комитет на оваа партија во Аеродром – исто така вработен во Министерството. Меѓу уапсените е и државниот правобранител, Емилија Радојкова, вработена во Катастар, нотари и бизнисмен.
Обвинителството ги сомничи дека склучиле 4 договори за продажба на државно земјиште – на кое требало да се изградат хотелски комплекси. Една од парцелите била наменета за изградба на Шпанските скали.
„ Имате конкретни договорни обврски со конретни рокови кога треба да се исполнат. Кога имате рокови кои треба да се испочитуваат тогаш можеме да зборуваме само дали се испочитувани тие рокови и што станува кога не се испочитувани“ кажа Трајчева.
Наместо поради неисполнување на договорните обврски еднострано да ги раскинат договорите и да го вратат градежното земјиште во сопственост на државата, како и да извршат наплата на договорната казна од купувачот осомничените склучувале анкеси на договорот со купувачот.
Јанакиески и петмината вработени во Министерството за транспорт и врски, се сомничат дека потпишале договори за откуп на парцели со вкупна површина од повеќе од 26.000 метри.
Обвинителството проценува дека штетата врз Буџетот е околу 2,6 милиони евра и бара „да не се отуѓува земјиштето кое е предмет во овој случај и имотот кои е незаконски стекнат“.