Основното јавно обвинителство за гонење на организиран криминал и корупција денеска реагираше на објавувањето на нелегално добиени документи од истрагата за предметот „Рекет“, кои се појавија на некои портали, а се однесуваат на изјавата на Орце Камчев кога го пријавил случајот во Обвинителството и во која има детали за наводна инволвираност на политички функционери.
Обвинителството нема да ги коментира информациите, но оттаму потенцираат дека откривањето на доверливи информации од страна на поединци претставува опасност и штета за севкупниот општествен систем и е кривично дело.
-Со протекување ваков вид документи се повредува пресумпцијата на невиност, се загрозуваат животи на инволвираните лица и воопшто сe отежнува текот на постапката, велат од Обвинителството и додаваат дека во интерес на понатамошното непречено спроведување на истражната постапка, ќе преземат дејствија за утврдување на фактите како овие документи се протечени во јавноста и ќе бара одговорност од сторителите.
Според Обвинителството, нивното објавување освен моментална сензација, не придонесуваат во остварување на каква и да е друга цел.
-Основното јавно обвинителство за гонење на организиран криминал и корупција и укажува на јавноста дека ваквите неодговорни извори на информации и медиуми со ограничена цел, нема да влијаат врз решеноста на обвинителството овој случај да добие комплетна завршница. Дотолку повеќе што зад исходот на овој предмет стои посветеноста и енергијата на севкупното обвинителство решено да го оправда своето име и да и застане на патот на корупцијата, се вели во соопшштението од Обвинителството.
Вчера некои портали објавија документ со исказот на бизнисментот Јордан Камчев кој го дал во Обвинителството за тоа како бил уценуван од Бојан Јовановски од септември 2018 до април 2019 година.