Дежурен јавен обвинител од Основното јавно обвинителство во Прилеп изврши увид на локацијата каде во текот на ноќта беше опожарен автомобил во сопственост на пратеник во Собранието, сооопшти Обвинителството.
По наредба на јавниот обвинител беа подигнати траги од лице место кои ќе се вештачат со цел да се утврдат причините за инцидентот. Јавниот обвинител издаде и наредби за обезбедување на евентуални снимки од видео надзорот на околните објекти во критичниот момент на опожарување на возилото.
Возилото на пратеникот Петар Ристески од ВМРО-ДПМНЕ било паркирано до неговата семејна куќа во Прилеп.
За палењето на автомобилот утрово реагираше и неговиот колега, пратеникот Миле Лефков: „Ноќеска е запален автомобилот на колегата пратеник Петар Ристески од Прилеп! Од клучно значење е како МВР ќе постапи во текот на денот“, порача тој. (Р.Н.)