Основното јавно обвинителство отвори истрага за случајот на 31 годишната Дебора Џамбази која почина при породување при однапред договорена операција со царски рез која се изведувала во приватната болница Моја Болница(Санте Плус) . Истрага е отворена врз основа на наодите на Комисијата која го истражува случајот и на барање на семејството, неофицијално потврдија за НОВА извори од Министерството за здравство. Обвинителството во моментот прибира докази по што ќе следи одлука дали ќе има кривична одговорност.
„По разгледување и анализа на пристигнатиот материјал и по добивањето на обдукцискиот протокол од Институтот за судска медицина, криминалистика и медицинска деонтологија ќе биде донесена јавно обвинителска одлука“, потврдиле за 24 телевизија од Основното јавно обвинителство.
НОВА од свои извори дознава дека се собрани сите оригинални документи од болницата Санте Плус и тие ќе бидат доставени во ОЈО. Комисијата ја комплетирала документацијата, земени се изјави од сите инволвирани страни, од семејството, од лекарите кои учествувале во породувањето, анестезилозите, од лекарите кои што ја примиле во КАРИЛ, од лекарката анестезиолог која била повикана на помош од соседната приватна болница која всушност го реанимирала бебето, од вработени во самата болница. Во текот на идната недела се очекува да биде готов и Извештајот од обдукциониот наод, по што Министерството за здравство ќе излезе со комплетна информација за случајот.
НОВА неофицијално дознава дека и покрај тоа што ДСЗИ ја затвори болницата, таму се уште се вршат операции. Ова го потврдија и во ДСЗИ, но оставаат обвинителство и другите институции да си ја завршат својата работа.
Родилката Дебора Џамбази почина пред две недели при породување со царски рез, а од болницата тврдат дека не починала кај нив туку во КАРИЛ. Документите и изјавите на лекарите кои ја примиле говорат дека жената била донесена почината, со мртовечки пеги, без пулс и без дишење. На младата жена, познат стоматолог од Кичево ова и било прво породување бидејќи се лекувала од стерилитет.
Бебето кое беше во многу тешка состојба е извадено од апарати за дишење, неговата здравствена состојба е подобрена и се следи за да се види какви последици може да има поради тоа што долго време останало без водух, потврдија од Клиниката за детски болести.